東京改裝車展2003（TokyoAutoSalon）已於昨日（1月10日）正式開幕，今屆會場內展出咗不少全新改裝車款及改裝產品，全都叫人目不暇給；今日我哋率先為大家介紹部份參展車輛，務求能一齊先睹為快嘛！
記者：鄭達基
全新萬事得RX-8跑車，響今屆改裝車展會場上有強化改裝版展出；由Mazdaspeed親自主理嘅RX-8MazdaspeedConcept，雖然依舊用上四度車門設計，但就加裝有全車包圍、大型跑車胎軨，望落夠晒跑味之餘，車內亦換裝上跑車桶椅同碳纖維裝飾，務求可讓你有置身於高性能跑車之感，當然唔少得重有跑車懸掛、制動組合同埋跑車尾喉等配備啦！
響會場上，本田廠方展出咗兩款經過改裝嘅MobilioSpike型號，其中一款名為ThinkPad嘅特別版，就以一啲追星者為主要對象，並配合上擁有先進技術嘅IBMThinkPad手提電腦，透過設於車上嘅天文望遠鏡，從而令車子化身成流動觀星台㗎！
而MazdaRoadster亦被Mazdaspeed視為改裝目標，其中呢部A-type版除裝有全車包圍外，另外重有跑車化懸掛、引擎入氣及排氣組合㖭！車廂內部不但以黑色為主調，而且重有碳纖裝飾及跑車桶椅配搭，吸引程度因而提升不少。
炎炎夏日去邊好？最好就梗係去沙灘游水，順道滑吓水咁啦！本田為照顧呢類用家，故特別推出MobilioSpikeSurfing型號，除用盡車廂每一寸空間，畀你擺放戶外活動嘅用品外，打開尾門更可變成流動更衣室，配合埋設於車上嘅花灑，沖埋身都無問題，係咪好方便呢？
除上述四款車外，會場上重有多款改裝車展出，例如萬事得廠方特別為X-Men2電影而設計嘅RX-8X-MenCar、由Ralliart主理嘅三菱LancerEvolutionWRC2（右上圖），重有就係由Impul負責改裝嘅March（右下圖）等等，包保令你目不暇給。有興趣嘅朋友，就要留意我哋《車天車地》版嘅報道喇！