響今屆北美國際車展上，福特車廠展出咗多款概念車，當中除MustangGT概念跑車及ModelU最矚目外，另一部大玩功能Crossover嘅FreestyleFX概念車，亦備受車迷注視；能按閣下需要而變身嘅FreestyleFX概念車，不但能迎合各種不同場合所需，多變座椅布局亦為賣點之一。不如就趁佢有望響2004年正式投產前，一齊嚟睇吓啦！
記者：黃凱穎
形象多變極具吸引力
話明功能Crossover，自然可以任你點玩點變啦！呢部有望於2004年正式推出嘅FreestleFX概念車，只需將車尾部份安裝或拆除，便可化身成6座位Sportwagon、4座位房車，甚至係4座位Pick-up都不成問題，完全能夠切合不同需要，而且過程重非常簡單㗎！與此同時，頭燈除用上照明度高嘅HID設計外，門邊鏡上亦備有指揮燈，從而令其他道路使用者更易掌握你嘅去向。
正如上文所述，FreestyleFX概念車本身可有多種變化，就連車內座椅亦備有靈活多變嘅配搭，以迎合不同需要；六名乘客分別乘坐於三排座椅上，而中後排座椅響有需要時可完全收摺起，從而令尾廂載物空間有所增加。另外，每張座椅除以高級真皮鑲嵌外，另外重備有側氣袋，以保障乘客安全，而中排更設有DVD影音系統，咁就算遇上長途旅程都唔怕悶啦！
呢部FreestyleFX概念車，廠方特別為其配上一台3.0公升V6Duratec引擎作動力核心，動力輸出強勁之餘，另外重配上一套CVT無段變速波箱，不但行車更順滑，而且重可以做出較傳統波箱，低約10%嘅耗油量㖭！然而，此車亦備有全新All-wheel-drive及TractionControl系統，以確保可有更出色嘅路面循迹性㗎！