又有一位讀者陳太來函轉告讀者劉小姐，一本關於五常法嘅書，叫做《現代管理五常法》，由明報出版社發行，可以打去出版社問一問。
一月六日，左丁山親戚回港渡假完畢，乘AirCanada返多倫多，飛機開晚上八點，佢坐機場巴士，五點半就到咗機場，checkin之後，重有大把時間去食飯，於是上到機就可以一覺瞓到溫哥華再轉機。你知喇，飛機餐係好難入口嘅啫。食完飯，送機者坐巴士返歸，七點鐘，巴士到達青馬大橋，點知唔郁得，為咗避風，巴士要轉入大橋下層，偏偏下層有交通意外發生，汽車如蝸牛慢行，卒之塞咗兩個鐘頭先至返到屋企。
那邊廂，親戚坐在飛機上，後邊座位空咗，飛機又唔開住，原來有乘客趕唔到嚟，空位隔籬有一位女生話畀空中小姐聽：「我同學重係喺青馬大橋塞緊車，過唔到嚟。」空中小姐嘆曰：「咁就冇法子等嘞，都唔知要等到幾時，你通知佢嚟到機場之後，book定聽日嘅位啦。」如此擾攘一番，飛機卒之起飛，因塞車趕唔到去機場嘅學生，希望唔會遲一日先返到學啦。
現時去機場，只得一條青馬橋，發生如此意外，附近交通大亂，何俊仁議員用咗四個鐘頭先至去到屯門，運輸署真係要諗吓辦法，防止同樣情況再度發生。
如果啲乘客送機者一早知道，人人去搭機鐵，就乜事都冇啦。機鐵其實亦要醒目一啲，以後一知道有同樣事件，不妨在機場主動出聲搶客，幫自己亦幫咗運輸署！