今年冬天天氣特別凍，「愛心大使」日日着到成隻裹蒸糭咁，都重係震過「貓王」，就連啲血都好似凝固咗咁，不過原來香港有好多人「血仍未冷」。
就好似一月四、五日，香港骨髓捐贈基金同蘋果日報慈善基金喺沙田新城市廣場搞咗一個叫做「生命重燃──骨髓捐贈驗血大行動」，幫一啲血癌病人搵無血緣嘅骨髓作移植。
大使見到一連兩日一共有二千三百幾名熱心市民冒住寒風，去到驗血會場排隊抽血，幫一啲佢哋見都未見過嘅人，嗰個溫馨場面真係令大使動容。
大使記得香港骨髓捐贈基金其中一位董事局成員張文新先生講過一句說話，大意係話今次行動唔同一啲大型慈善活動有好多經費支持，只係圍內嘅人搞出嚟嘅「小圈子」活動，可謂勢孤力弱。今次驗血行動之所以咁成功，有賴一啲工商機構鼎力支持，免費提供場地、飲品及配套設備。
機構計有（排名不分先後）：香港電台開心日報、新鴻基地產、新城市廣場、九廣鐵路、國泰航空公司、葛蘭素史克有限公司、東一堂、Lipton、皇后餅店、智式顧問有限公司。多謝晒！
暖流熱線
電話：29908688
傳真：23702192
電郵：
網址：