遙控賽車的MiniCar一向只有跑車款式，講求的是操控技術及速度上的競賽。不過月前遙控車生產商京商就推出了越野型的MiniCar，比傳統的更過癮，而首個Mini越野車場亦於日前宣告誕生，飛台、沙地、石地和鑊形跑道都有齊，足以考驗你身手同技術！想亡命飛車，如今在室內一樣得！
記者：劉耀祥
攝影：陳陶鈞
鳴謝：永利遙控科技公司、展藝模型公司
首批Mini越野車於12月推出之時，賽車場EGR負責人方先生就已構思製造專供Mini越野車使用之賽道。「當第一批車返咗嚟之後，首先要測試吓佢嘅能力，例如扭力、速度、操控性等，跟住先構思個場，邊度要加石仔、邊度要加飛台，等大家可以完全發揮部車嘅威力。而由構思賽道到完成就用咗大約一個禮拜時間，連續3日每日做十幾個鐘先至完成，建築費約一萬蚊左右。」
對於只有4、5吋長的Mini越野車，放在全長接近50米的Mini越野車場，已經係屬於一個「大場」，而場內更是危機處處，有吊橋、沙石地、連環飛台等高危「交通黑點」，就採訪當日所見，翻車、連環相撞等場面不時出現。所以要玩得安全，玩得叻，一於就搵製作者兼負責人嚟解構呢個Mini越野車場！
玩遙控車除了有速度及技術之外，另一個吸引人的地方就係有大量改裝零件供應，隨玩家喜好改裝成自己心頭愛，而改裝零件價錢由幾十蚊到幾百蚊都有，豐儉由人。據負責人方先生解釋，原裝「廠車」已經齊料，可以即買即玩。
新手改裝：車胎、轆軨
提升：咬地能力
初階改車多數都會從車胎及轆軨入手，簡單之餘更可直接提升越野車咬地能力，過彎都冇咁易跣胎。而轆軨改用合金製造，可以增強輪胎的硬度，令車仔都可以更加穩定。
進階改裝：轉更大摩打
提升：速度感
既然架車穩定咗，咁進一步當然就想速度上有所提升，所以進階改裝就係更換轉數更高、馬力更大的摩打。而摩打就多數分為日本貨及本地貨，價錢都只係幾十蚊咁上下。
老手改裝：車架、避震
提升：回彈、耐用
話明老手，當然由頭到尾都要大改，甚至連車架都改用合金車架，比原廠的膠車架更加硬淨，繼而就換埋油壓式避震，回彈更加快亦更加耐用。
眼見場內玩家玩得咁開心，所以就特別搵咗幾位「車手」傾吓，睇吓Mini越野車究竟有乜咁好玩？
DunDun吓好鬼盞
車齡：10年
擁有車輛：三菱Pajero
改裝項目：前後避震、車胎、LED燈、摩打
「一出就即刻買嚟玩，傳統遙控跑車就講求速度同賽道線位，每分每刻都要好留神，所以壓力都好大，反而控制越野車嘅技術各有不同，見到架車Dun吓Dun吓，好似真車咁，真係好過癮㗎。」
最愛玩移植
車齡：2年
擁有車輛：三菱Pajero
改裝項目：前後避震、車胎、Led燈、摩打、槓桿、天線、自製行李架及防撞欄、大量水印貼紙
「全架車由頭到尾都有改，除咗專供越野車用嘅配件之外，更特登走去買番同款車嘅模型，將車頂行李架呀、前後防撞欄等，都移植到架車上，重會Print啲貼紙黐落去，同埋加咗好多LED燈。」
EGRMiniCar賽車場
地址：旺角廣東道982號(近山東街)嘉富商業中心2樓
查詢：26259089
收費：
周一至周四：
12:00nn-6:00pm$10/小時
6:00pm-1:00am$15/小時
周五、周六及公眾假期
12:00nn-6:00pm$15/小時
6:00pm-1:00am$20/小時
周日
12:00nn-6:00pm$15/小時
6:00pm-11:00pm$20/小時
＊每日全日收費：$70（成人）$50（學生）