名攝影家水禾田早排幫嘉華地產嘅九龍塘嘉皇臺拍咗攝影集，唔知係咪人氣急升，九龍倉都搵佢設計鑽石山荷里活廣場嘅農曆新年裝飾，迎接羊年。聽講今次重係水禾田最大型嘅立體創作。
水禾田話，羊年寓意三陽啟泰，古時漢字「羊」同「祥」字互通，所以佢就用「羊」字嚟代表「祥」，用隸書寫「吉羊」兩個字，再用中國畫嘅技巧繪畫出羊形圖案，透過顏色來表達喜氣洋洋，同如意吉祥嘅氣氛。
大家今日踏入荷里活廣場大門同上一樓，就可以欣賞到水禾田嘅作品。
水禾田透露，今次設計，除咗係佢自己藝術生涯嘅突破之外，原來重係想藉此喚起港人對內地同胞嘅關懷，希望大家可以多啲捐助福幼基金會，以支持該會喺內地嘅減災扶貧工作。
香港置業為表揚長期效力公司嘅員工，日前向服務五至十年嘅二十名員工送贈水晶碗筷。港置董事胡日發講，呢份禮物寓意豐衣足食，佢哋重喺筷子刻埋員工個名。
今時今日做代理，大部份收入都唔係咁多，胡日發話送禮物畀員工，算係公司嘅一番心意，同對員工嘅一種鼓勵。呢二十個員工包括前線同後勤。
美聯物業新界區舊年總共做到四億營業額，比前年高逾一成，所以營業董事布少明話今年會繼續開舖，已經用六位數字嘅月租租咗兩個舖位，一個喺馬灣珀麗灣，因為係唯一嘅代理舖，布生話貴啲都值得，估計可以攞到珀麗灣八成市場佔有率，等日後第二期開賣就佔盡優勢。
而另一個貴舖就喺美孚新邨，對住地鐵出口嘅單邊舖，門面超過十五呎闊。布少明重爆料話正斟緊一個發展商旗下商場舖位，月租就平啲，只係五位數字。
另外，美聯九龍區營業董事羅國安今日生日，佢嘅得力助手李志成同一班跟佢十多年嘅兄弟班，噚日先同佢慶祝。羅國安話今日會同一班區域經理食晚飯同唱K。
觀塘區消費熱點集中喺裕民坊，不過，據新地最新季刊指出，佢哋喺觀塘嘅創紀之城五期，有十一層商場，面積約六十萬呎，預計喺明年底落成，將會成為觀塘嘅區域商場。
季刊重話，會有冷氣天橋接駁地鐵站大堂同裕民坊。
創紀之城第五期重有二十八層寫字樓，樓面七十萬呎，究竟落成後會係點樣？𠵱家可以睇住季刊披露嘅最新模擬圖片先。
蘭西
電郵地址：
