施政報告指出為要消滅財赤而加稅，唔使問阿貴，又係要向中產階級開刀。以往樓市好景，向中產階級開刀冇乜所謂，但阿董八萬五玩殘樓市後，重要向唔少已變成負資產嘅所謂中產人士抽水，真係天理何存呀？阿松話要向有存款嘅人打主意就加更嚇人，善於理財嘅人，有乜理由要受到懲罰，咁同阿根廷有乜分別？咁嘅政府點可以吸引投資移民來港，阿虎就快俾阿松激到斷氣。
好彩港股重未斷氣，美股杜指周三晚下挫145點，但噚日港股冇大跌，只跌12點，恒指收報9675，成交56.97億元。
恒盛東方（279）沉寂咗一段時間後，噚日突然發難，勁升38%，收4.7仙，不過成交不足30萬元，只係乾升。據聞有人想配售恒盛東方，暫時唔知係新股定舊股，價錢亦未定。最近，主要股東以3500萬元，向FutureStarGroup出售11.66%恒盛東方股權，每股作價9.6仙，作價相當高。據聞有關安排是為供股作部署，新股東會透過包銷供股而增持，並向證監申請豁免提出全購。
德興集團（611）噚日由低位反彈，大升34%，收報0.39元。公司大股東之前曾經洽售股權，但結果唔成功，噚日股價急升，又有傳聞話有新買家洽購。
冠捷科技（903）近期在2.40至2.60元之間上上落落，似乎準備突破，但噚日突然傳出大股東潘方仁，以每股2元減持600萬股，套現1200萬元，為一利淡訊號。此股之前獲不少基金吸納，貨源頗為歸邊，股價表現一直堅穩。冠捷液晶顯示器業務，毛利率有下調趨勢，若確認基本因素有變，可能會令股價受壓，有貨要小心。
阿虎