同任天堂重新合作嘅SQUARE，之前公布翻炒PS隻《FinalFantasyTactics》喺GBA度推出，可能係翻炒所以宣傳較少，不過唔知任天堂有心定想借勢，喺前幾日發表了新的GBA主機GBASP，定價12500日圓（約港幣$800）。
GBASP採折叠式設計，即係好似摩記電話咁向上開，而GBASP螢幕就採用Front-light設計，即係好似GBA加咗Afterburner咁，就算冇燈照住一樣玩得。用電方面，放棄咗用電芯而採用鋰離子充電電池，最高可連續使用18小時（使用燈光時10小時），充電時間只需約3小時左右，顏色目前共有銀、藍、黑三種。GBASP亦可以用番之前推出的GBA通信對戰線與GBA、NGC連接線，不過要用Headphone的話就要好似WonderSwan咁配專用耳機變換插頭，主機會喺2月14日同《FFT》同日推出。
賣肉排球遊戲又再延期，今次據消息係由於遊戲評級問題，如果遊戲被評為成人向（18歲以上先可以買），咁TECMO就會賣少好多，據知美國方面就起碼延至1月21日，香港行貨亦隨美版延至月尾，日本方面就暫未有公布。
製作《首都高》嘅Genki，自《首都高Zero》之後，過咗成年都冇乜新作，隻《首都高》圍住天橋又玩到厭，今次將於2月推出嘅《街道BATTLE》，好有香港清水灣飛車Feel，遊戲系統繼承自《首都高》，場景就會用有大自然氣氛嘅日本日光、榛名、箱根、六甲等街道，車種方面當然唔少得AE86、R32等鬥車啦！有興趣不妨留意。