松司長倡議本土經濟，卒之搞出一個九龍騰龍墟、上環大笪地，報紙話一啲交租嘅附近商舖，叫苦連天，因為俾騰龍墟搶咗生意也。藥王T賣藥，賣健康食品之餘，特登走去大笪地視察，星期一吃午飯之時，同我哋講：「大笪地完全唔係波，生意慘，貨物唔掂，睇怕就快要執晒。」
追數王在座，陰陰笑。追數王經營淡市奇葩，就係替銀行財務公司追收欠債，開檔三年，營業額大增，所以佢係香港經濟最佳指標，如果一日佢愁眉苦臉，嘆息生意乾塘嘅話，左丁山會立刻考慮買樓。由於佢平時接觸忠嘅、奸嘅、蠱惑嘅、本地人、外地人、菲傭等等各式人等，對社會嘅深層認識比我哋呢班中環人多。追數王話：「其實政府使乜搞甚麼本土經濟，照我話，警察同食環署唔好去深水埗、油尖旺、九龍城、黃大仙冚檔，等啲無牌小販與地下經濟自由發展，市民就會自動識得搵食啦。我敢擔保，只要當局半隻眼開，一隻半眼閉，本土經濟一定蓬勃發展！」
藥王T話追數王專講一啲另類方法，係道德派與高貴政府官員、議員聽唔入耳嘅。不過我哋又唔可以完全話追數王唔啱，東京新宿區歌舞伎町最旺乜嘢生意，大家心知肚明，但新宿日日夜夜遊人如過江之鯽，公司食肆生意好到不得了，左丁山一年去到，見到一架警車停正三級戲院出面，扯出一條標語，色情場所警戒中。以為會冚檔，點知導遊話：「重更加安全。」