文仙尼啱啱獲邀加入拉素董事局，係意甲歷來首個教練兼球會董事，呢方面嘅成就足以媲美曼聯嘅費格遜。我求大俠都算睇住文仙尼出道、成名、失意，家陣佢咁威水，大有機會做新一代球壇教父，感慨良多。
咪以為文仙尼平步青雲，以前無論佢響國家隊或者森多利亞踢得幾好，總有隊友鋒芒蓋過佢。好嘞，明明退咗休，又為咗幫艾歷臣了解英格蘭足球兼自己學法，特登去李斯特城踢過幾場波，俾人笑姣婆守唔到寡。後來教費倫天拿好好哋又因為隊波無錢，愈教愈衰黯然辭職。
返到拉素教波嘞，又睇住球會無錢而賣主將，成班波為個錢字惶惶不可終日。到今日球會財困壓力暫緩，佢又入到董事局話吓事，老土講句真係撥開雲霧見青天囉。
意大利波暴力事件愈鬧愈大。早幾日有兩個丙組艾維連奴球員俾球迷圍毆之後，前日重有個炸彈擺響一個艾維連奴球員嘅屋企。無記錯今年意大利已經三番四次發生暴力同埋恐嚇事件，你話球員想安心踢波都難。聽講球員聯會醞釀罷踢，係就大件事。
足球網站Dailysoccer（
西布朗都算衰囉，幾乎斟邊嗰個衰邊個。繼沙基利拒絕加盟之後，響世界盃踢到曉飛嘅美國後衞辛拿噚日都話唔肯去西布朗，理由係條件唔啱喎。計我求大俠話佢未必因為條件唔啱，而極可能係擔心西布朗護唔到級，話唔定半年後又要搵落腳地至真。再講，西布朗後防好似不設防咁，去到咪盞孭鑊，畀你都唔去啦。
如無意外，中國今年第一場國際賽對手會係世界冠軍巴西，而喺英倫嘅孫繼海同李鐵都話好想返祖國參賽。不過，二月英超聯仍然有好多賽事，由歐洲飛去亞洲又需時，一定影響比賽狀態；而且所屬球隊人腳眾多，分分鐘踢完場波，係球會正選位置都無埋。所以我求大俠勸孫、李要考慮清楚先好，況且想留番個好印象畀新教頭阿里漢，喺英超聯踢好啲一樣得啫！