趙薇同吳大維喺舊年嘅平安夜，至俾人踢爆一齊喺上海復興公園入面嘅「官邸」酒吧內跳辣身舞，之後重喺公園激吻㖭，點知話口未完，喺元旦佢兩個又俾傳媒影到喺上海嘅同一間酒吧度攬身攬勢，趙薇重成個人挨喺吳大維身上，表現非常親熱。
不過，吳大維本來就有位拍拖三年嘅台灣明星女友孟廣美，孟廣美日前接受深圳電台嘅節目訪問，言談間佢就暗示咗同吳大維已經不歡而散，佢重話如果可以將呢段關係登報取消嘅話，使幾多錢都願意喎！
孟廣美話自己𠵱家單身，佢唔想再有人喺佢面前提起吳大維呢個名，因為吳大維令佢個心留下好深嘅傷口，佢重話曾經同佢拍過拖嘅男朋友，都會同佢演變成家人，大家關係好好，惟獨是吳大維就傷得佢好深，喺呢兩個月，孟廣美就係不停咁瘦，佢話要好好療傷，唔想令親友再為佢擔心。
至於吳大維嘅家姐喺台灣接受訪問時，就撐細佬同趙薇只係好朋友，而趙薇嘅經理人陳蓉就話年輕人喺埋一齊都冇乜嘢啫，唔需要諗咁多喎。
徐子淇噚日同唐思盈去幫化妝品公司示範化妝，徐子淇今晚又要返英國繼續學業，佢話返咗嚟香港一個月，由於工作關係，只係休息咗兩日，而佢Daddy就特登請咗一個月假嚟陪佢，佢話好對Daddy唔住。
而同余文樂傳過緋聞嘅唐思盈，有見近排有關阿樂爭女嘅新聞，都會列埋佢個名出，佢話有少少介意，不過好彩煩唔到佢喎！
身為愛護動物協會宣傳大使嘅莫文蔚，早排同兩隻被遺棄嘅狗仔一齊影海報，莫文蔚講開兩隻狗嘅身世，佢話：「呢兩隻狗好可憐，佢哋主人要移民，送咗佢哋去愛護動物協會，佢哋由細開始一齊長大，一分開就會喊，等咗好耐都冇人領養。我自己有三隻貓，所以養唔到佢哋，如果過咗三個月冇人領養，就會人道毀滅，不過好彩最後都有好心人收養佢哋。」
陳豪噚日去尖沙嘴出席無綫新節目「紅星會」嘅記者會。陳豪遲到大半個鐘先至到，問佢點解遲到？陳豪話：「又斷正！對唔住，真係唔想㗎！」由於「紅」節目位位都係重量級嘅嘉賓，問陳豪覺唔覺得自己人氣急升同被受重視？陳豪話：「唔好咁講，托賴，好運啦，我會盡力而為。」
肥姐沈殿霞噚日同薛家燕、胡楓、李克勤等人出席無綫「紅星會」嘅記者會，當台上播放肥姐同愛女欣宜喺節目入面嘅一段短片，內容提到肥姐不明當年鄭少秋點解不在她生欣宜前，提出大家嘅問題，同埋冇後悔生咗欣宜時，台下嘅肥姐感動到流下眼淚，事後肥姐話：「我冇後悔生欣宜，係佢激勵咗我嘅人生觀。」
