張栢芝與陳冠希被指秘密拍拖，曾與陳冠希傳緋聞的鍾欣桐，昨日公然將自己與栢芝拿來比較。雖然阿嬌表面上句句讚栢芝，指對方靚、高、瘦而且皮膚好，但明顯句句有骨，她更強調自己亦有市場，自信十足。
近日牽涉入圈中多角戀中的主角如陳冠希（Edison）、陳小春、陳文媛（BoBo）及Twins等，昨日齊到港台出席「第二十五屆十大中文金曲」記者會，而何韻詩、黃凱芹及馬浚偉等亦有到場。
郎才女貌！
余文樂與Edison日前有傳因同時追求Twins成員鍾欣桐（阿嬌）而鬧不和，更爆粗互罵。昨日有消息指Edison原來正與張栢芝發展地下情，事件中的另一女主角阿嬌聞言即說：「關我乜嘢事呀？」問到她是否相信Edison與栢芝正在蜜運中？阿嬌說：「佢哋唔係一向都係好朋友咩？你哋不如問番佢啦。」
再問阿嬌可覺二人合襯時，她即時將自己與栢芝拿來作比較，大讚栢芝但句句有骨說：「郎才女貌，絕呀！栢芝咁靚，我又唔夠高，又唔夠瘦，皮膚又冇咁好，眼又唔夠大，又唔夠標致。」但阿嬌語畢亦即時自信地補充說：「不過我都有我嘅market（市場）㗎！」
至於栢芝昨日則透過中國星發言人李小姐回應與陳冠希的緋聞，她說：「朋友點都係朋友，無論𠵱家定將來，都冇機會同Edison發展。」
陳冠希BoBo咬耳仔
對於有周刊指阿嬌曾表示與Edison之間的關係是「過去式」，反而承認與余文樂「最啱傾」，阿嬌昨日說：「我都冇講過呢啲嘢，我唔明點解個人都未去，會有過去式。我亦都要講，我去探班主要係探個導演同埋監製，而唔係探Edison。」當問到阿嬌與阿樂或Edison間有沒有發展機會時，她笑說：「我覺得唔應該喺呢個時候講有冇發展機會，到時拍拖先諗啦，到時追我先算啦。」
另一方面，Edsion與緋聞女友BoBo近日傳已復合，二人平日在公眾場合一向表現避忌，昨日陳冠希於活動上刻意沒有理會阿嬌，反而高調地與BoBo咬耳仔，未知是否有意向阿嬌示威？Edison事後則表示因自己遲到，才沒有機會與阿嬌交談。提到他與栢芝的緋聞時，Edison驚訝地反問：「吓！張栢芝？」並不停哈哈大笑，又說：「佢同我冇乜關係，我識佢，不過地下情就一定冇。我都冇時間，邊會有咁多女朋友。」
而BoBo一聽聞有關Edison與栢芝的緋聞時，即時拍手大叫：「好嘢！」不過她隨即肯定地表示不相信此消息。BoBo說：「𠵱家搞得幾開心、幾刺激呀，總之我同Edison就冇開始過，亦唔好講到我翻『啅』佢咁核突。」
小春甩難阿彌陀佛
而近日被指遭栢芝翻𠝹的陳小春，昨日亦一派「甩難」模樣，他說：「好呀，我𠵱家退出啦，歡迎光臨。至於信唔信，我都有腦㗎，唔係人哋話係我就信咁蠢。郎未娶女未嫁，阿彌陀佛。Edison都唔錯呀，呢排講吓佢先啦。」
採訪：李珮洳 攝影：陳志嵐
