德國名模歌地亞雪花（ClaudiaSchiffer）自從結咗婚同有喜之後，一直深居簡出，做其少奶奶。雖然花姐冇行天橋，但佢嘅魅力依然驚人，唔少狂迷成日跟住佢，話要同佢結婚。
我羅拉就聽聞原來前日喺德國柏林嘅法庭，審緊一個迷戀花姐嘅莫桑比克男人JulioS.，呢位三十二歲嘅老哥上年九月為咗想同花姐見面兼求婚，竟然揸住支玩具槍同戴個慶祝萬聖節嘅鬼怪面具，衝入去珠寶店打劫，結果佢搶咗一百二十四隻婚戒同一隻手表，總價值成四十五萬港元。
JulioS.重話，佢只不過係好掛住花姐，要咁多戒指無非都係想花姐揀到一隻鍾意嘅，而且佢又唔知花姐戴開咩尺碼，所以咪要搶多啲囉。佢又話原本諗住去婚紗店偷幾件婚紗，點知間舖頭太多人，惟有轉咗打隔籬間珠寶店嘅主意。呢位仁兄黐得咁應，個法官有乜嘢辦法唔判佢入精神病院吖！
另外，一個三十三歲嘅意大利廚師前日亦喺英國為佢涉嫌舊年九次喺花姐屋企附近騷擾佢嘅案件出庭，個廚師否認控罪，法官暫時判佢入精神病院，下月五號再出庭。