捷美能源（702）踏入2003年以後，股價表現明顯好咗，起初以為幕後炒家搵到水源，但熟悉隻股內情嘅經紀陳話唔係，佢話轉咗揸Fit人就真。經紀陳話，捷美現時仍在收貨階段，暫時唔好寄咁大期望。
小初記得，舊年10月開始唔睇好捷美，結果隻股由0.45元，一路插到落去最低0.118元，但踏入今年，股價表現有改善，噚日收市價0.17元，雖然與以往高位1.48元仍然差天共地，但今個月其實已升咗近19%，走勢相當強勁。
經紀陳話，舊陣時玩開捷美嗰班人，好似淨係識得炒上，但就唔識得散貨，結果輸鋪勁離場。其後聽聞隻股輾轉落入另一班猛人手上，但呢班炒家唔會喺一時三刻就將隻股大幅踢上，所以博反彈者須要有耐心。
小初問經紀陳，隻股重有冇足夠藉口炒上？佢話，舊年強力推介捷美嘅歐資大行，到現時仍未有轉View之意，小初可以淡定。
慕容小初