有個老友喜歡用滑浪嚟形容炒輪，上到一個靚浪，高高低低唔知幾過癮，低位撈底買Call輪，高位見頂反手買Put輪，就算喺最難玩嘅上落市中，一樣搵到錢。趙飛雲去年11月至年底，有過類似經驗，可惜年結落咗車之後，直至現時仍在海上漂。
前日提過美股將出現整固，可以冒險炒一轉恒指Put輪，美股確如所料，周三晚出現調整，但跌幅又重得滯，杜指大跌145點，納指更跌2.1%。恒指噚日低開62點，一早已考驗20日線（現處9604）防線，冇水位唔敢貿然入市，結果恒指不但守住20日線，午後跌幅更逐漸收窄，而外圍美股期指又向好，短炒Put輪計劃又要取消。
由於目前好淡勢均力敵，造好造淡同樣艱難，惟有轉移目標搵股票炒。噚日約大行老友食飯，佢話可以留意泰興光學（389），公司最近似靜極思動，做咗唔少公關工夫，重準備組團睇廠，一改過往低調作風，似乎有後着。
泰興主業做眼鏡，近年積極發展下游銷售業務，繼歐美市場之後，亦進軍國內市場，公司前景及基本因素不俗。過去1年公司不斷回購或大股東增持，現價2.675元，相當於5合1前0.535元，同公司平均回購價相若，現價往績PE7.6倍，預測5.8倍，仍屬於偏低水平，照計唔怕買貴貨，可吼位在2.65元附近買入，首個目標2.85元，破位上望3元，短炒跌穿2.55元先計數離場，中線則以2.45元作止蝕位。
趙飛雲