個市唔多落得，恒指只係微跌12點，冇受美股急挫影響，恒指由低點起計回升76點，睇勢有機會喺羊年來臨之前重見萬關。
指數要好，必須有重磅龍頭股，中移動（941）俾鬼子行柴台，暫時冇得郁，最有份量帶起指數嘅，乃係滙豐（005）。滙豐收購美國Household成事機會大，對滙豐有利，愈近股東表決之期，滙豐股價愈硬淨。
滙豐Call輪可以揀啲埋手，太近期嘅例如2月或3月嘅最好避開吓，搵9545呢件4月夠鐘嘅比較適合。隻輪現價47.5仙，溢價得1.4%，槓桿率去到18.6倍，非常爆炸。到4月收購Household塵埃落定之時，滙豐上到98元（去年中高位）嘅話，隻輪值1.30元。炒滙豐Call輪搏殺格搵9545，穩陣格則搵9677。
大市似乎炒落後，例如中信泰富（267）升完又升，又似乎炒紅籌國企。
中銀（2388）係落後股，又有紅色背景，遲早會上番去，至少要見番8.50元招股價，冇話長期丟架嘅。相信過年之前，唔再潛水，昨收8.20元，升5仙。先幾日講過嘅中銀Call輪9462，係時候收集，7月到期，大把時間，現價10.3仙，溢價只係1.3%，槓桿率8倍，數據吸引，波動上嚟，當然冇滙豐Call輪9545咁勁。
章盛