施政報告噚日出街，有人話內容「假、大、空」，但又有人話分析透徹，更有人夠膽死話係上任以來最好，八方覺得應該問下基層市民意見先最真，於是搵個政黨地區幹事老友問吓啲師奶、大嬸意見，結果係三個字：「啋啋啋！」
此話何來？老友引述觀塘李師奶意見，彈老董同「瘦𤷪𤷪」嘅阿松淨識加稅就唔在講，最乞佢憎嘅係封面隻色：「啋啋啋、𠵱家我哋重未夠慘咩！用橙（慘）色做封面，重係好橙（好慘）嗰隻，真係大吉利是！」
不過老董就唔覺自己好唔掂。噚日立法會答問大會，黃宜弘因為前日瞓着咗冇企起身送佢，噚日補鑊，大讚話，瞓着係因為對佢施政有信心，老董俾佢𠱁到「鬆毛鬆翼」。
之後邊個「質」佢就「寸」邊個，連陳婉嫻話政府唔夠落力推本土經濟，都俾佢「寸」：「騰龍墟呵！你提出嘅嘢喎！發生緊喎！」之後佢重叫嫻姐可以考下負責嗰兩位局長何志平同唐英年，佢哋實交到功課。
睇見阿董唔識死咁嘅樣，唔怪得有人話橙色都不足以形容香港人未來五年有幾慘，要加埋個杏色落去，「杏加橙」，先至係襯到絕！
傳真︰2623-9278
電郵︰