如果列斯當日唔係猶豫不決，就唔會白白唔見咗八百七十萬鎊（約一億零九百萬港元）。
係人都知保耶好有機會喺周末之前由列斯過檔韋斯咸，而外界重估佢嘅轉會費大約係四百五十萬鎊（約五千六百二十五萬港元）左右，即係比原本嘅九百萬鎊（約一億一千二百五十萬港元）平咗一半。之但係，正確數字原來係三十萬鎊（約三百七十五萬港元），真係平到你唔信。
季尾就會同列斯約滿嘅保耶由於唔肯續約，所以列斯早就將佢掛牌出售。保耶喺季初有機會以九百萬鎊加盟利物浦，但利記話保耶喺傾約嗰陣冇誠意，交易咁就拉倒咗。列斯之後諗住再同保耶續約，點知保耶死都唔續，結果拖吓拖吓，拖到保耶就快回復自由身。而列斯見勢色唔對，咪拿拿臨賤價賣走佢囉。
我求大俠覺得如果列斯喺保耶轉會事件上真係要蝕大本，都係自己攞嚟，事關佢哋如果可以好像曼聯咁有制度，喺球員重有半年合約就傾續約，咁就唔會搞到自己唔見咁多錢。
舊年世界盃金球獎得主德國門將簡尼，喺權威雜誌《踢球者》嘅投票之中只能排喺列文同贊斯之後而排第三名。簡尼事後話呢啲只係一個遊戲，所以冇將結果擺喺心；但計我求大俠話，簡尼佢真係要好好反省一下，事關佢喺上半季嘅表現真係不敢恭維，而且負面新聞又多，如果再闊佬懶理，隨時保唔住喺國家隊嘅正選席位。
意大利球證哥連拿連續第五年俾IFFHS選為全年最佳球證，呢位曾喺舊年世界盃決賽執法嘅光頭球證可以連續五年冧莊，證明咗佢嘅執法水準的確係非常之高；但從另一個角度嚟睇，冇一個球證有哥連拿嘅水準。咁樣睇嚟，推行職業球證制度似乎係唯一可以提高球證執法水平嘅方法。
早幾日羅馬球員喺一個名為「給你微笑」嘅慈善派對度表演，為殘疾人士籌款。成班職球員喺各個表演環節度都好搏，最搞嘢係到壓軸時教練卡比路、中場托迪同埋後衞彭路基齊齊着裙跳舞，又扭腰又踢腿，搞到笑聲不絕。羅馬職球員好耐都無咁開心囉。希望經過今次咁有意義嘅活動，可令職球員更加團結啦。
有報道話有個美國歌星仔，自從古妮高娃出道就追逐呢位大美人裙下，不單止奔波全球為靚女打氣，重自費為古妮高娃出宣傳雜誌同CD㖭，終於搞到份工冇咗，重要俾銀行追數。我求大俠見到呢則新聞當然唔會話「紅顏禍水」咁老土，要怪都係怪呢位仁兄唔化，重同啲𡃁仔𡃁妹咁無知？