阿董連任後首份施政報告，同以前嘅施政報告犯上同一樣錯誤，就係總以為政府能夠帶領香港經濟走出困境，讓市民有不切實際嘅期望，外資就停晒手腳，坐喺度觀望政府表演。新一年嘅施政報告，自然又會叫市民失望。
港府其實只要睇餸食飯，做番個小政府，講少啲乜嘢大珠江三角經濟概念，香港商界自然就會按本身需要去發展，有需要時便會推動政府去做嘢，港府應恢復以往嘅積極不干預政策，由市場自己決定點做，咁樣肯定更有效率。港股見施政報告冇驚喜，恒指午市升幅由逾80點收窄至35點，收報9688，成交近70億元。
中電信（728）近期頻頻出現唔聽中央指示嘅情況，照計應該冇運行，不過高盛將中移動（941）剔出模擬組合，改以中電信代替，刺激中電信股價上升4.25%，收報1.47元，成交2.69億元。Cookie話，高盛見中移動一跌不起，自然追過第二隻，中電信上市咁耐都未正式炒過，仍屬處女股，而且上面蟹貨冇中移動咁多，應該易炒好多。
信星（1170）公布創辦人之一陳正雄減持，消除市場對之前股份出現大手成交之疑惑。由於有主要股東減持，股價循例都要偏軟一陣，噚日下跌3.5%，收2.075元。不過，今次陳氏減持理由係退休，而且手貨獲基金全數接下，基本上係一項利好消息，若非基金睇好信星鞋業前景，根本唔會輕易沾手。黑客話，信星此類鞋業股，市場上欠缺街貨，大部份都落在基金手上，基金若想額外要貨，只有等公司批股或主要股東減持。基金今次接貨水平在1.88元，呢個價位日後有強大支持力。
阿虎