董特首鼓勵投資移民，重會制訂有關入境政策配合，雖然暫時只係初步構思，長實已經拿拿臨湊熱鬧，為旗下新盤畢架山1號宣傳。營業經理郭子威話，農曆新年後會去上海及北京兩個出名有錢佬多嘅城市搞推介說明會，向內地富豪介紹畢架山1號，到時會邀請有意入市嘅準買家親臨現場參觀，由發展商提供酒店住宿兼法律同財務意見，比港人買大陸樓盤體貼得多。
長實咁識做，無非睇中內地客早排買旗下紅磡海名軒一擲千金嘅豪氣，加上今年九龍區豪宅供應量極之龐大，唔諗啲計仔都幾難突圍，長實已經部署好，嚴格挑選一批為數20人嘅置業精英，訓練佢哋講得一口流利又道地嘅普通話，方便傾生意。
董特首噚日喺施政報告中話，仍然會繼續開拓西九龍、啓德、九龍灣、將軍澳同東涌、大蠔，共約百四公頃土地，預計可興建超過二十萬個住宅單位。呢啲發展工程𠵱家如期進行。
舊年十一月政府先出手救樓市，𠵱家又話大量提供住宅地，唔通特首又轉軚？但聽講實際上執行部門都已經收到暗諭，要放慢手腳嚟做，所以大家唔使咁擔心。
以蘭西了解，西九龍區已經差唔多定型，可以增加嘅單位唔多，現有規劃中嘅將軍澳市中心則已完成填海，好多空地，但要政府攞出嚟賣先可算數。至於東涌同啓德，連海都未填，所以拖吓拖吓，恐怕係十年八年之後嘅事。
噚日係吉日，唔使講蘭西都知，因為特首都揀呢日宣讀施政報告，中原新界舖位部分行亦揀呢日開張。
蘭西依時十一點到達，諗住早啲收料，點知等咗十五分鐘先見中記高層陸續到場，而負責切燒豬嘅師傅重誇張，足足遲咗半粒鐘，因為要切完燒豬，分行先算係正式開張，所以點都要等佢。幸好十二點前都係吉時，否則唔知點算好。
香港置業噚日舉行全民大會，全部近500員工出席，其間就論功行賞，升咗4名猛將做區域董事，分別係九龍屋苑嘅姚偉南、港島屋苑嘅翁祥生、九龍豪宅及發展商項目部嘅黃德華，同將軍澳、沙田、馬鞍山及西貢區嘅王品弟。
港置董事胡日發話今年嘅座右銘係「全面向好，全面進攻」，會積極開分行，以一手支援二手。既然多開分行，咁即係話會有好多升職機會。
舊年最佳分行經理係柏景灣嘅曹仲康，最多宗數成交營業員係麗港城分行嘅謝珍珠。
地產代理近排忙於埋單計數，利嘉閣勢頭唔錯，周一攞完永泰亞洲嘅尖沙嘴漾日居銷售比賽獎項，噚日又獲通知，攞到恒基全年賣樓大獎。據講係利記第一次得獎，唔怪得過檔利嘉閣3個月嘅董事廖偉強咁開心啦。
呢個比賽已經舉行咗好多年，分行數目超過一百間嘅屬於A組（聽講冠軍係中原地產），其他就屬於B組，冠軍係利記。廖偉強話，佢哋促成嘅宗數畀第二名多2倍以上。廖偉強講，其中一個公司做得多嘅樓盤係大角嘴港灣豪庭。
今次嘅獎品係金牌一面，加上由四叔李兆基頒發，零舍有意義。
廖偉強話，月底會同各區經理食飯慶祝。不過公司上個月至收支平衡，應該唔會有花紅分。
蘭西
電郵地址：
