老董開口講嘢，股民都唔期望有乜靚料，繼續揀個別股票玩，趨勢似乎係搵啲落後股埋手，例如沉悶一排嘅中電信（728），一升就係4.3%，跑贏其他「3電」。中電信冇Call輪上市（聽講就快有），冇得炒。
中信泰富（267）日前因國內基建項目投資回報保證可能撤銷問題，股價散過一排，近日影響漸告淡化，4日前起生晒，昨日再升25仙，收報15.25元。兩隻熱門Call輪9480同9298，跟住正股上升。
9480收5.1仙，彈升19%，4月初到期，溢價12.9%，槓桿率29.9倍。9298收3.9仙，只升得8%，6月底到期，溢價19.9%，槓桿率39.1倍。
正股擺明有人維持秩序，有機會升多1蚊幾毫，中信Call輪可以博吓，上便講嗰兩件，升得少嘅9298比較啱炒，買賣易。溢價唔低，短炒可以，咪揸得太耐，見5仙以上散水可也。
九倉（004）呢輪亦係落後大市，昨日最高15.80元，收15.55元，升5仙，前日成1.6球，昨大增至11.5球，似有動作，搵啲九倉Call輪玩短線，諗得過，最靚對象係9476，現價20.6仙，溢價2.5%，槓桿率7.5倍，溢價吸引，槓桿率爆炸力亦唔弱，博上番27仙，執3分錢利潤。
章盛