董特首施政報告，主題係振興經濟、加強內地融合同解決財赤。俗語有云，主婦（唔係巧婦）難為無米炊，港庫嚴重入不敷支，特首當然唔能夠好似布殊咁瀟灑，大灑金錢以振興經濟，除了鼓勵投資移民來港一招外，特首暫時仍無良策。
至於加強與內地融合，建立更緊密關係，背靠內地面向世界，建立亞洲國際都會，係特首描繪嘅遠景，有否成果，仍要放長雙眼嚟睇。解決財赤，特首則只謂會認真對付，但避重就輕，將個波交畀3月宣布嘅財政預算案。除一兩項目外，施政報告基本上並無新意，亦好難藉此而重建港人嘅信心。
投資移民會為香港帶來「新水」，而且係「近水」，可救「近火」，即時打動經濟，特別係金融、房地產，以及本土消費都會有所裨益。議而決，決而行，港府必須盡快制訂政策，愈快批准投資移民來港，經濟就愈快恢復動力。
每年會有多少投資移民來港，要看港府政策寬緊，以及中國政府配合放寬外滙管制而定。假設投資移民配額每月為1500名，1年將有18000人來港，再假設有3成人投入樓市，平均投資400萬元以上的物業，每年將可為樓市注入逾200億元，高價樓及豪宅的成交亦會增加近5成。樓市轉活，買賣釐印費收入亦增加，特別係豪宅及中高價樓的釐印費佔整體的大部份，估計這方面可為庫房帶來10多億元的收入，有助紓緩財赤壓力。
港股噚日曾一度上升過百點，但尾市回軟，恒指收9688，升35點，成交則上升至近70億元。大市升勢受制於50日線（9759），短期走勢料仍反覆，趨向個別發展。國企股繼續見有基金吸納，表現強勢，鎮海煉化（1128）同安徽皖通（995）分別有7.3%及6.3%進帳。國企係今年投資的一道主流，年內升幅會有3至5成。
tom.com（8001）強勢畢呈，中段最高搶到2.225元，收2.15元，仍升0.1元，成交大增，中期升勢已成，初步可見2.4元。中電信（728）終於發力，高收1.47元，升4.3%，可繼續持有。
郭兆誠