數數手指，重有廿幾日就到農曆新年，係時候幫屋企換吓新家具。要有新鮮感，其實簡簡單單換窗簾已經有耳目一新的感覺。講到換窗簾，好多人都貪方便去羅湖商業城訂做算數，不過我就嫌款式選擇唔夠多，如果大家都好似我咁奄尖聲悶的話，不妨去福田區的南園路，呢條係出晒名嘅布藝街，一條短短的街已有十多間大大小小的布藝店，除一般窗簾外，還有布藝梳化及家品，款式琳瑯滿目，連我都唔執輸訂做了一套新窗簾，你又點睇呢？
記者：歐嘉荃 攝影：小王子
聽深圳本地人講，南園路就好似灣仔皇后大道東，聚集咗唔少布藝店，是本地人買窗簾的必到之地。好似呢間共有兩層的布藝店，算是全街最大的店舖之一，店內陳列了幾十款不同的窗簾，款式多籮籮。此外，老闆話訂做窗簾一般都可即日起貨，所以最好事先自行度好尺寸，然後先嚟訂做，咁就夠晒方便。在訪問期間，碰巧遇到正打算訂做窗簾的港人GiGi，於是打蛇隨棍上，邀請GiGi友情客串，睇睇佢有乜心水選擇！
布料襟睇襟污糟
由於陳列品款式較多，睇到GiGi都笑住話花多眼亂唔識點揀好。「我本身鍾意清純的圖案，圖案太誇或者顏色太搶都唔係考慮之列」。睇咗咁多套陳列品，GiGi就選擇咗呢套綠色的窗簾。「我覺得呢隻布個Pattern夠晒簡潔，顏色配搭又唔太俗氣，最緊要係墨綠色能擋陽光又襟污糟，我最怕白色窗簾，易封塵又易污糟。」
厚絨布質料特別
GiGi睇完套墨綠色窗簾，又走去研究呢幅絨窗簾。「呢幅窗簾用絨布做，摸上手幾過癮，我幾鍾意布上的波浪形Pattern，帶點七十年代阿飛的懷舊味道，可惜呢幅布唔襯我屋企，唔係我一定會考慮買！」
羅馬簾不應選大花圖案
香港的窗口位一般較細，兼且又有窗台位，老闆詹先生話揀窗簾最好揀羅馬簾，實用又美觀。好似呢幅羅馬簾，就來自西班牙，質料為棉麻，配上珠繩羅馬軌，最啱香港的住宅使用。佢又話選擇做羅馬簾的話，應選擇條紋、格仔或中國字的圖案，若選大花圖案的話，可能每幅窗簾只有一兩朵花，未能充分發揮整幅布的圖案，較為嘥料。
全天候啱用日夜簾
除咗窗簾外，我覺得百褶簾亦是不錯的選擇，好似呢幅國產的百褶簾就日夜都咁啱用，詹先生話：「香港人好少買百褶簾，不過呢款日夜百褶簾就幾啱香港用。百褶簾用了兩幅唔同質料的布製成，一幅是白色的通花纖麻布，只要將通花部份拉下，可以讓陽光透射或者在夜晚時使用，而藍色的下半部份屬於遮光布，只要將其拉上，便可完全遮光。」
地址：深圳福田區南園路89號
電話：（86）75583639133
營業時間：9:00am-10:00pm
呢間布藝店，除咗有窗簾外，重有很多款布藝家具及床鋪出售，家具訂做需時約一星期，公司更會安排託運到香港，價錢大約?3?一公斤。
國產床鋪用品
臨近新年，店員李小姐話床鋪用品成為近期熱賣的貨品之一。好似店內的國產TerryDouglas床鋪系列，全系列選用亞麻布質料製成，這質料即使洗完後都能保持柔軟而有簇新的感覺。這套格仔圖案屬雙人款式，一套四件有2個枕套、床笠及被袋。除了格仔外，還有印度繡花、淨色及條子系列。
繡花布花瓶
我覺得店內最搞鬼的布藝家品就係呢個花樽，全個陶瓷花樽用繡花布套住，充滿濃濃的西歐風情，售貨員說：「布套係度身訂做，再用膠水封死，所以個套唔可以更換，污糟了亦不能拆出清洗。」
貴妃床椅二合一
這張貴妃梳化，全張用軟腍腍的絨布製成，摸上手極度舒服，最抵死係可以由貴妃椅變成貴妃床，坐又得瞓又得，全張椅的布套更可拆出清潔。
地址：深圳福田區南園路103號
電話：（86）75583650122
營業時間：9:00am-10:00pm
講到富特色，我就覺得呢間舖的布藝精品都幾特別，負責人張小姐說：「我哋專做布藝精品，有時更會應顧客的要求，設計出唔同風格的產品，款式較為特別，喺市面未必搵得到。」
中式咕𠱸賣得最快
問到店內最受歡迎的貨品，張小姐手持的兩個咕𠱸就是最受歡迎的款式之一。「香港人多數鍾意深色的咕𠱸，好多人都會買現貨，有時都會訂做合心水的款式，例如在咕𠱸上加些鈕扣、窗簾垂或繩等，有時我哋更會依客人的要求，利用幾幅布拼貼成一個咕𠱸，讓顧客可以擁有獨一無二的貨品，客人開心我哋又開心。」
書法布料屏風
經過這店的櫥窗前，已被櫥窗內的這扇屏風吸引住，全個屏風用加了色的樺木製成，質料硬淨又襟睇，而屏風的中央位置則加了書法字樣的布料，令整扇屏風增添不少文化色彩。若然只想購買書法布料的話，每米價錢為?40。
地址：深圳福田區南園路85號
電話：（86）75583626785
營業時間：9:00am-9:00pm