《城市論壇》講家庭和諧，港大教授話香港家庭將來陷於崩潰邊緣，聽落好得人驚，睇吓數據，二○○二年頭九個月，配偶虐待案有二千四百六十宗，比前年同期增加三十六巴仙，都唔少噃，一位現場女士好激動，講到婦女係「家庭倖存者」，香港豈真如此悲慘？
節目完畢，成家人去飲茶。據青山醫院精神科醫生曾繁光講，一家人經常聚埋一齊飲茶食飯，係維持家庭和諧嘅好方法。佢自己一家三十餘人，老老幼幼，個個禮拜一齊飲茶，返到屋企就由男人煮飯，闔家共歡。大家不妨效法，促進家庭成員感情。
飲茶時候，碰到工業C，手揸新款數碼videocam，同老婆仔女拍攝生活影帶。架機好似幾靚噃，問佢買咗幾多錢，C太搶住答：「阿C好夠運，聖誕公司派對抽到二獎攞番嚟㗎！」工業C眨眨眼，示意左丁山唔好出聲。
二十分鐘後，工業C過嚟左丁山張枱，細細聲話：「其實架機係我買嘅，用咗萬幾銀。我想買好耐，老婆成日話貴，喝住唔畀買，卒之我喺同事度抄橋。班男同事趁公司開聖誕派對，人人買禮物返公司，包裝得靚靚，原來全部係畀自己嘅，拎返屋企就話畀老婆聽自己夠運中咗二獎、三獎、四獎之類。我靈機一觸，照辦煮碗，老婆都唔知幾鍾意，猛話我行運，非常開心，你唔好穿我煲呀！」工業C真識得促進家庭和諧，怕且曾繁光都要讚佢醒！