近排本地娛圈有陳冠希同余文樂嘅粗口對罵事件，我大口羅拉八到番嚟，原來日本嗰邊有好多女星表面好老友，其實亦周不時唔妥到出晒面，唔少重係同門姊妹，好似小池榮子同佐藤江梨子、後藤真希同藤本美貴咁，佢哋嘅關係已經去到水火不容嘅地步！
雖然佐藤江梨子同小池榮子都係同屬YellowCab巨乳軍團，重一齊拍過護髮公司廣告，但原來佐藤勁唔順超榮子。聞說榮子喺公司好大膽，事務所社長同佢「驗胸」時，榮子會出手打人，社長買佢怕先力捧佢，重畀榮子公開戀情。佐藤即時覺得自己失寵，所以佢對榮子恨之入骨，重周不時四處講佢壞話㖭！
我大口羅拉收到料，原來後藤真希喺Morning娘嘅時候，已經好唔妥師妹藤本美貴。雖然藤本啱啱先獲安排加入Morning娘，但以前佢因為落選過，所以後藤一直好睇唔起佢。不過，有傳呢兩位青春偶像，未入行嗰陣都係wet妹，後藤重出名暴戾，曾經打到細佬流鼻血。𠵱家後藤見親藤本時都會互睥兼口角，火藥味甚濃，差唔多要大打出手，真係最似陳冠希同余文樂！
貴為新一代日本廣告女王嘅菊川怜，居然同啲二線水着女星川村光都有牙齒印。話說川村光曾經喺一個電視節目上面好大口氣咁話：「菊川怜做代言嘅石油廣告，本來係由我做嘅，之不過要我着迷你裙、戴頸巾扮個咁嘅懷舊造型，我都唔敢着嚟見人，因為咁我先推咗去咋！」菊川怜深覺自己被唱執二攤兼被取笑，當然㷫過辣雞！
松浦亞彌同Sonim雖然都係Tsunku家族嘅人，但原來佢哋係分屬唔同事務所。兩個人出道嘅時候相若，嗰陣Sonim同後藤真希細佬Yuki合組EEJUMP，因為間事務所冇乜錢宣傳，所以谷得唔係咁好，相反松浦嘅後台硬淨好多，所以一出碟即刻入到流行榜十大，搵錢又搵得多過佢，即時令Sonim同佢公司老闆眼紅。時至今日Sonim獨立發展，仍然當松浦係敵人。
最近突然跳槽嘅天海祐希，原來係因為唔順超葉月里緒菜。天海祐希本來喺舊事務所工作得好好哋，不過上年佢見冇人要、出名麻煩多多又多要求嘅葉月里緒菜嚟咗公司，天海祐希怕佢影響自己喺公司嘅待遇，所以閃電跳槽，但就搞到佢舊公司好唔開心。