前日信星集團（1170）一名董事減持逾10%股份，但噚日股價仍然算係守得住，只係跌咗3.5%，收2.075元，相比呢位董事減持作價1.88元同埋1.89元，仍然高出唔少。有業績支持，有股息派嘅實力工業股，果然同一般莊家股有好大分別。
經紀黃話，若然小初鍾意鞋業股，不如留意將於下周五公布全年業績，Size大過信星好多嘅裕元工業（551），隻股近排走勢異常強勁，預料業績會唔錯。
裕元近1個月，股價由23元水平一路抽上，噚日再升2.75%，收28.05元。
早前裕元亦有個董事，以每股24.50元沽出近150萬股，但一樣冇影響市場信心。裕元上半年度業績麻麻哋，有多少倒退，但聽聞下半年形勢大變，生意好到你唔信，加上舊年隻股斥巨資，向母公司收購廠房，交易中阿媽保證佢哋會有一筆盈利，所以加加埋埋唔少嘢，估計裕元下周公布嘅業績有相當睇頭，若然唔係，冇理由佢個勢咁強勁。
慕容小初