容祖兒（Joey）噚日同郭晉安、左慧琪喺將軍澳電視城出席無綫新劇《美麗在望》嘅記招，Joey喺劇入面暗戀郭晉安，為咗演繹醜女，Joey會整個假鼻同哨牙，實行有咁醜搞到咁醜，不過後嚟Joey忍唔住去咗整容，可惜最後搞到併發症死埋，上咗天堂。
問到Joey介唔介意做醜女，佢就話：「唔介意，一定拚老命去做，我恨拍劇恨到流晒口水，已經三年冇拍過劇啦，而且醜樣只係拍一集！」
講到呢幾日陳冠希（Edison）同余文樂之間嘅負面新聞，同屬英皇嘅Joey力撐Edison唔會郁手郁腳，佢話：「件事咪當新聞囉！我又唔係重案組調查科！我唔會去問佢，大人嚟㗎嘛，唔會喺咁多人面前動手動腳，佢最多咪條脷lam吓lam吓。」
台灣少女組合S.H.E近日為新碟《Together》拍電視廣告，佢哋竟然變身做老女人，三位靚女化上老妝，Selina扮名流貴婦，Hebe就將頭髮盤起做女強人，Ella就扮大肚婆。雖然三個化起老妝都幾可愛，但當化妝師幫佢哋畫皺紋時，佢哋就鬼殺咁嘈，猛叫唔好再畫，真係好貪靚㗎。
黃家強噚日去商台做訪問，講到最近陳冠希同余文樂不和呢件事，家強話：「我都有聽過，細路仔鬧下交，大個就friend㗎啦！」問到家強有冇俾人「問候」過？佢話：「冇呀，我都冇問候過人喎，我細個嗰時只係調皮，唔係壞。」
一班華裔小姐噚日出發去哈爾濱拍外景，佢哋首先去深圳，再轉機去瀋陽，先可以去到哈爾濱。點知3號墨爾本佳麗羅珮弄喺瀋陽機場發現自己唔見咗個銀包，之後有工作人員喺深圳機場聽到廣播話執到個銀包，發現係羅珮弄嘅，佢先開心番。
台灣組合可米小子𠵱家喺台灣嘅人氣直迫F4，唱片銷量突破三萬，唱片公司決定加拍歌曲《超人心》嘅MV放喺碟內，佢哋重喺台灣搞咗個MV猜謎活動，因為MV裏面可米小子同時愛上同一個女仔，唱片公司畀歌迷上網投票競猜最後邊個會退出。
馮寶寶同胡美儀前晚喺觀塘拍亞視新劇《萬家燈光》，嗰晚劇情講佢哋扮演大肚婆，喺街上淋雨。由於前晚氣溫驟降，寶寶姐着咗四件羊毛底衫同一件潛水衣打底，而在未埋位時各人喺觀塘某酒樓休息，重有唔少的士司機攞住酒樓嘅單叫寶寶姐簽名，寶寶姐即發揮搞笑本色話：「我重以為你叫我幫你簽單㖭。」
