以往到深井就梗係會即時想到食燒鵝，今時今日的深井不只是燒鵝馳名，還有獨特的香料西餐。隱藏在這裏就有一位卧虎藏龍的老闆，他精研各種香料，配以不同食物，將香料潛能發揮，為追求新鮮的態度，甚至自種香料，務求盡善盡美！
記者：陳冰麗 攝影：陳盛臣
逢星期一至五刊出
偶然經過深井，發覺愈來愈旺，兼且愈來愈有特色，陸續有多個大型屋苑落成，不少有特色的食店都在此開店。好似這間Kcal位於深井村，由外面看，非常有田園感覺，門前放有一列花槽，又有太陽傘，成個花園一樣，好有外國度假Feel。
肉質清香鬆化
據Wakey統計，羊鞍最受食客捧場，平均每日有十五至二十個Order。一試之下，肉質出奇地鬆化，烤焗時間控制得夠恰當，一點也不韌口，好有肉味，嚼多兩嚼又發現有種獨特的清香味。原來羊鞍用了新鮮露絲瑪莉（Rosemary）醃製過，怪不得零舍香。套餐中還包括湯、大蝦沙律、飲品及女士養顏妙品的燕窩。
試過羊鞍，調味調得唔錯，肉質又唔韌，好有肉味。
黑醋加陳醋夠醒胃
鵝肝畀人的感覺除了香滑之外，還帶點膩，所以大廚特別秘製一個酸甜的配汁作為伴食，令人有愈食愈醒胃的感覺。配汁是用了黑醋混和陳醋，再加入多種野菌如蘑菇、秀珍菇、雞髀菇等煮成，有醋的酸，又混雜各種菇的香，配合鵝肝同食，簡直錦上添花。
我哋第一次嚟，都係因為俾佢嘅裝修吸引。香煎鵝肝唔錯，酸酸甜甜有助中和鵝肝嘅膩，雖然要百幾蚊，但畀足份量，有兩大嚿，兩人share食一件都夠晒喉。
出奇咁惹味
要親嘗黑松露菌才能體會當中之鮮香味，只是用了少許的黑松露醬連同鮮帶子一同炒成的天使麵，即時變得惹味非常。
有朋友住喺附近，話呢間舖啲嘢唔錯，咪嚟試試囉。其中黑松露菌帶子炒天使麫炒得幾乾身，加咗黑松露菌又帶起啲麫，價錢都幾合理。
7吋巨菇有魚有蟹
並非浪得虛名的巨菌菇，直徑約有6至7吋，肉厚。在菇面平均一半釀入深海白鱈魚，另一半釀入鮮蟹肉、青紅椒、薯茸等一同焗之，一菇有齊多種口感，白鱈魚的魚油滲透入菇內，食落更香，加有薯茸，食埋都足以飽肚，飯都毋須叫。
冰糖蛋白燕窩焗蘋果$38（中）
南瓜燕窩杯$58（下）
鎮店三甜品
肉桂薑餅帶有濃郁的肉桂香及薑味，餅本身夠鬆化。冰糖蛋白燕窩焗蘋果以蘋果做杯，刮去心後藏入燕窩碎再鋪上拂至起泡的蛋白焗成，要趁熱食。
南瓜配燕窩以煮爛的日本南瓜隔渣後再混和冰糖及燕窩煮成，鮮甜的南瓜茸與無味的燕窩夾得恰到好處。
踏入餐廳內，環境不算大，只有十張枱左右，裝修簡約，空氣中飄來悅耳的拉丁音樂。老闆及侍應們都是後生仔女，充滿活力氣息。餐牌上的食物多數有香料配搭，其中包括有迷迭香、羅勒、百里香等等鮮香草，聽老闆Wakey講大部份香草都是自己栽種，更風趣地說：「自己種成本平啲嘛！」
來到Kcal，除感受到那份田園氣息外，菜式亦崇尚自然，以烤、焗為主菜式較多，餐前餐包沒有牛油伴食，換來的是橄欖油及黑醋作伴。點了一個烤焗露絲瑪莉羊鞍，原來是這裏大廚Joe的至強作品。
整個羊鞍份量夠睇頭，未上枱已聞到遠遠傳來迷迭香的清香，未食已令人吞口水；切開羊鞍，肉身多汁，入口沒有羊羶味，很鬆化！召來大廚Joe一問，才知道羊鞍作法特別，用了鮮香草醃製過，難怪份外清香！
-17歲入行，入廚逾8年
-擅長西菜，包括意、法菜式
-先後於山頂餐廳、酒店做過
-現為Kcal總廚，主理新派意、法Fusion菜，秘製醬汁等。
老闆Wakey相當健談，好Nice。問他為何選深井開店，他的原因好特別，不是一般為理想的客套答案。他怕怕羞羞地說：
「最大原因係近屋企囉！因為屋企就喺對面，來回店舖都唔使二十分鐘。」
雖然是有點令人意外，但起碼夠坦白。
原來Wakey未在深井開舖前，早在四年前已在尖沙嘴與朋友合股開餐廳，面積比現在的大三倍，所以對於管理上下一切事務都駕輕就熟。因為搬入深井後的關係，Wakey發覺來回尖沙嘴花去好多時間，於是把心一橫在住屋對面即深井村另開新舖，經營短短不足三星期，發覺這區確有潛力，肯捨得花錢食的人比預期多。
Wakey憶起：
「曾試過有一枱客埋單找數要成千蚊，埋單時佢哋叫我埋去，重以為被投訴價錢貴，原來係客氣咁讚賞我哋食物質素好，當時真係嚇壞！」
見他如此開心笑着說，恍如有客人重賞。Wakey續稱：
「家陣舖頭雖然細，但嚟嘅食客都係街坊街里，好有親切感，同以前尖沙嘴區相比，面對嘅壓力都少咗，而且無想過食客有咁好嘅反應，真係好開心。」
為了加強餐廳的特色，Wakey特別去報讀營養學，希望設計餐單時有所幫助，但由於仍在求學當中，他怎也不肯出鏡，一來怕羞，二來是未畢業，怕自己讀不成書就無面見人云云！
Wakey的健談，街坊鄰里的親切，整間餐廳就在這種輕鬆氣氛下經營，個個員工都帶着愉快心情工作，出品食物質素自然高，臨走時試埋自家製的薑餅，好有滿足感地回家去。
電話：24911938
地址：荃灣深井村88號地下
營業時間：12:00pm-3:00pm、6:00pm-11:00pm
座位：48個
付款方法：現金或信用卡（免費代客泊車）