美股周一全面上揚，杜指急升171點，收8773，係去年12月2日以來最高收市，而納指則漲34點，不過，回到亞洲時段，各地股市反應都頗為審慎，港股早段高開後即乏力再進，午後更一度跌逾60點，恒指收市9652，跌13點，市場普遍預期美股在連升3日，累積上升400多點後，將會出現調整。
美股連日上升，初步已反映了對布殊刺激經濟計劃的樂觀期望。本周美港兩地股市的焦點，都係領導人的施政報告，但美國人會因減稅而受惠，香港人則冇咁好彩，起碼都要承受港府因要削減財赤而加稅的待遇。
董特首嘅施政報告，重點係同珠三角融合，但遠水救不了近火，經濟唔掂，樓市唔好，財赤都幾難解決。孫九招救市，基本上亦係遠水，樓市無疑係受到少少刺激，但曇花一現，又變番「死咕咕」。回歸後5年，已令到香港樓市出現結構性內傷，必須要落重藥，先可將經脈再打動。只要放寬投資移民，注入「新水」，樓市復活，先會立竿見影。假若投資300萬至500萬元置業，即可獲得居留權，每年接受三數千個名額，相信不用三幾個月，一手和二手樓市都會出現生氣。
噚日上升同下跌股數相若，出口股有較佳表現，主要係投資者認為布殊方案會帶動消費，升勢最勁係福田實業（420），高收4.8元，大升0.4元，德昌（179）和德永佳（321）分別有0.1元和0.15元進帳。福田自成為基金股後，脫胎換骨，升勢一發難收。另一隻基金股信星鞋業（1170）有大手上板，4000萬股1.88元和2800萬股1.89元，股價則收2.15元，升0.1元，成交總值1.35億元，若今次大手成交係有新基金上車，則信星股價未來最少仍會有3成至4成的升幅。
科網股轉強，ASM太平洋（522）高收17.5元，升0.9元；品質國際（243）高見1.97元後回收1.93元，升2仙；tom.com（8001）重上2元關，收2.05元，升0.1元。
品質和tom仔一向係科網概念股升市嘅火車頭，料會帶動另一輪升潮。
郭兆誠