上月大除夕夜，四十八歲的陳漢立獨自返內地參加朋友的飲宴後猝死。元旦日，妻子阿儀與孩子原本等待丈夫回來歡度節日，詎料，從電話中接來他的死訊，傷心欲絕，至今仍無法接受突如其來的噩耗。刻下，家境清貧的她，還要為亡夫的殮葬費用而奔波，感到前路茫茫。
「嗰日我哋即刻返去大陸，就算睇到佢條屍，我都唔敢相信呢件事；到𠵱家我重未接受到佢嘅死，一句說話都冇講低，真係好突然。」四十二歲的新寡阿儀激動地說。
阿儀與任職餐廳經理的丈夫阿漢結婚多年，育有三名兒女，除了二十四歲的長女已出來社會謀生之外，二十歲的次子及十六歲的幼女仍在求學階段。為了幫補生計，婚後她曾在製衣廠從事車衣工作，其後又任職家務助理，惟受經濟不景影響，數月前遭裁員失業，家庭的經濟開支便全靠其夫負責，收入僅足餬口。
「失業之後，我成日都有嘗試搵工，但係市道咁差，搵咗咁耐都冇消息，之前仔仔讀大學要交學費，我哋都係問親戚借錢幫手，有時佢哋讀書要買參考課本，每個月又要食同埋畀雜費支出，生活已經繃繃緊，重邊度儲到錢，𠵱家我都唔知點算好！」每念及亡夫的身後事，阿儀顯得憂心忡忡。
在阿儀眼中阿漢是一個既顧家又愛錫子女的好丈夫及好爸爸。由於他從事飲食行業，假日甚少放假，鮮有機會與孩子外出遊玩。為了維繫親子間的感情，每晚放工後，他便會馬上返家，珍惜與孩子短聚的時間，一起談天說地或收看電視節目。
「就算我哋點樣頑皮，爸爸都好少會打我哋，好多時佢都會同我哋坐低慢慢傾，大家嘅關係就好似朋友一樣冇乜代溝，今年會考，佢重成日鼓勵我畀心機讀好書。」就讀中五的Apple娓娓道來與爸爸之間的父女情。
為了日後的生活，阿儀盼望盡快辦妥亡夫的殮葬事宜後，繼續找工作。她坦言：「阿漢冇乜學識，好希望啲仔女讀多啲書，所以我希望快啲搵到嘢做，繼續供啲細路讀書。」
蘋果日報慈善基金了解阿儀的經濟苦況後，即時從「殮葬專戶」撥款一萬三千元，助其殮葬亡夫，以解燃眉之急。 捐款編號：C0788
暖流熱線
電話:29908688
傳真:23702192
電郵:
網址：