北美國際車展第二擊<br>日產IInfinitiTriantConcept明日新星

北美國際車展第二擊
日產IInfinitiTriantConcept明日新星

昨日,我哋報道過關於今屆北美國際車展上展出嘅部份新車,相信唔少車迷都會俾佢哋吸引住,故此今日再特別為大家報道車展會場嘅盛況;其中最吸引莫過於以鷗翼式車門設計示人,以及甚具跑車意識嘅日產InfinitiTriantConcept,另外重有新一代豐田Sienna,以及賓利Azure終極版等等都好吸引㗎!不如𠵱家一齊嚟先睹為快啦!

記者:陳偉林

日產InfinitiFX45
媲美轎車格局
繼豐田以凌志RX330攻佔豪華SUV市場後,日產亦推出豪華至極嘅InfinitiFX45,作為SUV嘅新旗艦,並配以強勁嘅4.5公升V8偈及恒式四驅組合,相信定必會成為頂級豪華轎車InfinitiQ45以外嘅另類SUV選擇。

日產InfinitiTriantConcept
進佔SUV房跑車市場
日產除於車展會場展出全新Maxima及Quest車系外,同系嘅Infiniti亦展出咗房跑意識甚濃嘅TriantConcept,務求能與寶馬X5同平治M-Class爭一日之長短。新車以超卓操控同循迹性見稱,加上一台3.5公升V6偈,匹配恒式四驅及富剛勁感嘅賣相,勢必成為SUV市場上嘅一顆明日新星。

三菱Endeavor
專攻SportySUV市場
踏入2003年,三菱車廠會改用全新FamilyLook,而主攻北美嘅Endeavor恒式四驅SUV新車,仍保留豪華五座位設計,以消閒及運動形象作賣點,有別同廠另一款受歡迎嘅Pajero。新車用上一台3.8公升V6偈作主打,並輔有4前速半自動波組合,既有On-road出眾操控性,又具備全天候Off-road嘅要求,自然更深得用家喜歡啦!

三菱TarmacSpyder
狠辣開篷車
隨着全新Colt嘅誕生,三菱車廠又以TarmacSpyder嘅概念車名義,推出高性能開篷跑車。新車以一台近似LancerEvo.Ⅷ嘅2.0公升Turbo偈作骨幹,另備有恒式四驅及5前速半自動波裝置,還裝有主動式AYC及ACD電子系統,若然有機會面世的話,定必引起車壇一陣哄動呢!

本田StudioE
新派SUV意念
去年底,本田車廠曾公開介紹新派SUV嘅Element,今趟亦係底特律車展焦點之一;呢部以多用途走粗獷性路線嘅SUV新車,掛上StudioE概念名義,賣點在乎於左右對開式車門設計,並裝有一台2.4公升i-VTEC偈,馬力輸出達190匹,並備有6前速自動波及恒式四驅選擇,可望於今年4月登場。

瑪莎拉蒂KubangGTWagon
高性能SUV典範
潮流興SUV,想唔到就連意大利貴族化跑車世家嘅瑪莎拉蒂(Maserati)亦來趁熱鬧。呢部形象予人一新耳目之感嘅KubangGTWagon,據知以Spyder藍本作設計基礎,性能毋庸置疑之餘,掀背式五門組合重不失一份SUV嘅實用感呢!

豐田Sienna
媲美同廠Previa七人車
響東瀛本土及香港,豐田Previa多用途MPV可謂一枝獨秀,但喺北美地區,豐田則以Sienna壓倒不少美國MPV;而今趟響底特律車展上,廠方更推出新一代Sienna,尺碼較前有所增加之餘,新車重備有雙電趟門組合,並用上一台3.3公升V6偈,匹配全新5前速自動波箱,相信當正式投產時,又會再一次掀起熱潮呢!

賓利Azure開篷跑車
不離尊貴形象
隨着車廠公布ContinentalGT跑車之後,總部位處Crewe嘅賓利車廠,響車展期間亦宣告會推出雙門Azure開篷跑車嘅終極版本,以饗一班忠實車迷嘅長期支持。新車除車頭部份有稍作改動,以及用上四輪專有18吋跑車合金胎軨作配搭外,車廂配備更可謂豪華至極,盡現尊貴汽車工藝嘅最高境界。