培養閱讀興趣 - 左丁山

田二少北辰主持嘅「語文教育及研究常務委員會」（簡稱語常會）主張會考高考取消拉曲線制，改以「絕對分數」評定及格。左丁山舉腳贊成，取消拉curve，自己講咗好幾年，不過人微言輕，冇人理，而今紅人田二少出到聲，怕且政府與考試局會睬吓啩。不過考試局中人，照左丁山所知，好為拉曲線辯護，要佢哋改變主意冇咁易，田二少可能得個講字啫，所以對記者發言嗰陣，點都唔肯講推行時間表。

田二少又提到家長要培養子女閱讀興趣，講就好易，做就要講家長誘導孩子嘅能力咯，有一條好橋，就係教小學生登入「網上中華」（即中華里，二○○二年十二個好網站之一，雅虎推介）www.chinalane.org ，引誘佢哋睇中國歷史文化故事。此網站專為小學生而設，用卡通畫講中國歷史文化（譬如過新年風俗習慣、年獸、農曆年與新曆年的對比、遊戲等等），從日常生活出發，引出探究歷史嘅興趣。小孩睇完又睇之後，就買淺白白話文歷史故事書畀佢睇，循序漸進，等小孩自動睇書睇上癮。
馬主H個仔讀小學之時，重未有互聯網，馬主H一味買歷史漫畫、漫畫莊子、漫畫孔子、漫畫三國之類書畀個仔，之後教佢睇白話三國，然後節本三國，最後全本羅貫中《三國演義》……之後馬主H個仔自動搶韁，睇中國歷史書睇到上身上癮。各位家長，現在有「中華里」網站幫忙，事半功倍，只要有耐心，一定可以培養到子女興趣嘅！