美股隔晚大升，港股冇跟到，主要因為港股已連升4日，先透透氣，睇吓美股會唔會調整先。另外，老董今日宣讀施政報告，人心觀望。
電盈（008）通過5股合1，喺股東會表決嗰陣，股價曾高見1.37元，尾市掟落1.31元低收，跌2仙。5合1新股今朝掛牌，臨時冧把係2906，折合6.55元，變成「大價股」。電盈搞咁多嘢，目的希望基金入市，令股價好睇啲，有呢份心意，電盈若見低位，可收集啲相關Call輪博吓反彈，快買快賣，揀交投金額最大嘅9637，昨收17.5仙，跌10%。隻輪今年11月到期，溢價26.3%，槓桿率7.5倍，溢價唔平，只啱短炒，揸得耐未必有着數。吼住16仙左右買貨，執一兩分錢利潤即散水。
地產股榮辱不一，恒地（012）有進帳15仙，其他3大地產股隻隻軟啲。
恒地輕輕一郁，兩隻相關Call輪9473同9615即刻登上架勢龍虎榜，分別彈升25%同13%，排名阿2同阿4。9473喺3月初夠鐘，現價5.5仙，溢價11.5%，槓桿率44.7倍；9615喺5月夠鐘，現價10.4仙，溢價20.1%，槓桿率23.7倍。兩件輪槓桿率勁大，投機味重，高追不宜，最好等正股回落半皮之後博反彈。
章盛