大家知唔知，全世界有四億個乙型肝炎帶菌者，其中百分之七十五係華人？內地每年就有五十萬人死於乙型肝炎併發症，香港人十個之中就有一個係帶菌者，每四個帶菌者就有一個有機會會死於呢個病症，都咪話唔得人驚。
以人大副委員長程思遠命名嘅程思遠「中國‧國際」肝炎研究基金於九八年成立，已故歌星羅文嘅主診醫生廖家傑係基金信託人。
廖家傑同八方講，前年佢哋去過廣西為新生嬰兒打預防針，發現一年最多只有八千嬰兒受惠，相對內地每年二千萬新生嬰兒，真係杯水車薪，而且內地𠵱家打預防針，只需十蚊人民幣就打齊三針，好多人都畀得起，所以廖醫生話教育同宣傳更重要。
呢個月十三號至二十六號，基金會舉行「世代無肝炎雙周」宣傳活動，第一日嘅記者會上，大家會見到容祖兒同鄭伊健，因為佢哋要繼承「籮記」遺志，對抗肝炎。廖醫生重話「世代無肝炎」呢個口號，籮記都有份創作嘅。
傳真︰2623-9278
電郵︰