著名嘅北京頤和園聽鸝館飯莊，喺西安分店周一嚟咗一班豪客。點豪法？據八方睇內地《華商報》報道，呢班豪客一行十二人，食咗一餐總值人民幣三十六萬六千（約三十四萬幾港紙）嘅午飯，打破西安宴席最豪嘅紀錄。據聞，呢班豪客當中只有一個係內地人，其餘都係香港商人。
三十幾萬嘅午飯，有乜嘢食？據報道，有十六道熱菜，按足滿漢全席規矩咁，單係客人飲嘅頂級香茶，茶葉一両就要人民幣萬幾蚊。而客人飲嘅酒係價值人民幣一萬六千蚊（約萬五蚊港紙）嘅白酒「康雍乾」。
其中一道菜叫「鯉魚鬚子」，主要係用鯉魚頭上嘅兩條鬍鬚做成，據稱要用成百幾條鯉魚先至做到呢道菜。
據講呢批神秘豪客，二十幾日前已經向飯店方面落柯打，前日晨咁早八點幾已經去到飯店，搞個歡迎儀式先入座，要食嘢唔使郁手，講一聲，班「宮女」即刻餵入口。食得咁豪氣，乜唔係話香港經濟不景，連政府都呻窮嘅咩？
（圖）矜貴的滿漢全席惹遊客垂涎。資料圖片
傳真︰2623-9278
電郵︰