小初問經紀黃，今年燃氣股究竟重有冇得炒？經紀黃話，舊年好掂嘅燃氣股，估計今年仍然有得炒，皆因鬼佬基金繼續睇好。
經紀黃話，咁多隻燃氣股當中，外資行最鍾意仍係華燊燃氣（8035）同新奧燃氣（2688），一來兩隻股過往幫佢哋賺到錢，能夠交到數；二來係公司管理較其他燃氣股為佳。
事實上，兩股較其他燃氣股，無論成交量同埋氣勢，確實大好多，有鬼佬幫手真係唔同啲。
好似華燊咁，噚日升5%，收0.84元，成交金額有成1409萬元。至於新奧燃氣，剛公布與石家莊燃氣集團成立中外合資公司，噚日大升8.4%，收2.25元，成交金額亦有785萬元。
此外，兩隻股比起1年前最高位，股價明顯跌咗好多，例如華燊最高見過1.42元，而新奧亦見過3.55元，所以現階段芬佬真係唔怕買，而散戶亦有機會坐一轉順風車。
慕容小初