張慧儀早前話已經接受咗舞王男友霍紹裘（阿Nick）嘅求婚，有消息話佢哋下個月會返張慧儀馬來西亞嘅屋企舉行婚禮。待嫁新娘子張慧儀呢排心情特別靚，佢前晚重同未婚夫，約埋佢嘅舞蹈學生一齊去咗尖沙嘴山林道火鍋館食消夜，佢哋食到凌晨時分先離去。一行人食咗醉雞鍋、牛肉同菜餃等，埋單約七百蚊。
記者前晚見到張慧儀右手中指戴住隻好大粒嘅鑽戒，佢就好怕醜咁話：「唔好影隻戒指，好似好hardsell咁，我怕佢（指未婚夫）唔鍾意。」
問到張慧儀籌備婚禮嘅進展，佢話：「我要澄清，我其實係會喺農曆年帶阿Nick返大馬同我媽咪見面，正式提親，婚禮嘅嘢重未有決定。我會帶蘿蔔糕探媽咪，相信媽咪會鍾意佢，因為阿Nick心地好好，我以前都遇上過唔開心嘅感情創傷，直至遇到佢後就發覺可以付託終身。」
陳明君最近又接咗一套三級片，叫做《燈草和尚Ⅱ白蛇前傳》，話明係三級片就梗係有性感演出，點知陳明君就話：「我客串幾日，做一條白蛇，係一條唔性感嘅白蛇。」真係估佢唔到，陳明君竟然話喺三級片入面唔使行性感，認真離奇！
肥媽瑪利亞噚日同李惠敏及張學潤等人喺銅鑼灣GreenSpot為下個禮拜一舉行嘅慈善演唱會綵排，今次籌得嘅善款會送去泰北同緬北嘅中國人華文教育工程基金，而佢哋嘅目標係籌六十萬元，肥媽話佢用咗兩個鐘頭聯絡表演嘉賓，佢重踢爆劉錫明喺去年年底生咗個BB女。
好耐冇見人嘅林志美最近又再戰樂壇，佢噚日去咗新城做蘭茜《一個靚噓》嘅節目，講吓扮靚心得。林志美話月底會出新碟，隻碟有十六首歌咁多，除咗有自己新歌之外，重會翻唱其他歌手嘅歌，好似陳奕迅嘅《幸福摩天輪》同許志安嘅《昨遲人》咁。
袁詠儀（靚靚）𠵱家喺杭州橫店拍緊新劇《醉無敵》，橫店氣溫得零下三、四度，靚靚驚地方落後，要捱凍又冇啖好食，所以帶咗十幾箱行李去，重要買定大堆電器，連電動滑板車都買三架，靚靚日前話每次等埋位嘅時間都好長，有架滑板車就可以返酒店休息下，自己有架私家「車」方便好多。
新加坡嘅《新明日報》日前訪問劉德華，問佢俾麥浚龍（Juno）Fans鬧係「老餅王」嬲唔嬲？佢話：「我唔嬲，首先係要搞清楚件事，佢哋點解要鬧我，最重要係佢哋嘅動機。」跟住有人好大膽咁問華仔會唔會因為俾人話老餅去整容，佢話：「點解我要整容，佢哋係嫌我年紀大，唔係話我個樣老，我覺得冇必要，我唔會整容。」
