美股周一持續大升，但港股噚日缺乏方向，恒指收報9652，跌13點，但成交額增加至53.51億元。
電盈（008）噚日早市重有1-2%升幅，但通過咗併股5合1後，股價反而偏軟，倒跌2仙，收報1.31元。併股建議本來係想吸引外資吸納，但有啲電盈小股東怕併股後，會學其他仙股一樣大跌，所以沽貨走人。畢竟電盈係大企業，持有香港電訊，有別於一般仙股。不過，散戶投資電盈慘痛經歷，阿虎係絕對理解。
信星集團（1170）晨早就有兩宗大手成交上板，每股作價1.88元，股數合共3904.6萬股，成交金額7340萬元，下午再多1宗大手成交，每股1.89元，股數2500萬股，成交額4725萬元，令信星全日成交增至1.353億元，遠高於平時百零二百萬之成交額，3宗大手上板成交股數，相當於信星已發行股數逾17%。唔少老友問發生乜事？ｉ師傅話，可能係基金年結後進行技術性轉倉，唔似有特別事情發生。不過，此股噚日逆市升4.88%，收報2.15元，阿虎就認為唔係咁簡單。
Sunday（866）前日因為數碼通（315）一句不排除進行併購而勁升逾9%，但噚日兩間公司雙雙否認有併購計劃。現時電訊市場競爭激烈，Sunday又點會冇興趣併購，但現時電訊業前景不明，數碼通就算有多餘錢，都唔會亂出高價進行收購，即係話價錢唔夠殘就唔會有人吼，所以投資呢類具併購概念嘅電訊股，必須等股價跌至好似公司破產咁款，才趁低吸納博反彈，而且切忌高追。
現時電訊商大多會死撐到底，直至有人肯投降及接受賤價收購，市場才會出現真正嘅併購活動。
阿虎