國際影星成龍，年前夥拍英皇國際喺賣地場投到兩幅地皮，開始進軍地產市場。其中大埔龍成堡已經起好，今日開記者會。成龍會出席主持植樹同打手印儀式。聽講英皇楊受成都會現身。
龍成堡位置喺長實嘅盈峰翠邸隔鄰，喺九九年十二月，用一億五千多萬投番嚟，可建總樓面約九萬七呎，共提供七十七個單位，包括分層單位及獨立屋，面積介乎千三至四千五呎，據講意向呎價約三千元。
呢個係成龍投資第二個地產項目，第一個係屯門龍成花園，地皮喺九八年一月用兩億五投到，可建總樓面約二十二萬呎，提供約三百個單位，面積六百幾至千幾呎，成龍有份參與設計。而二千年開售時，成龍都有出席記者會幫手做宣傳。
有樣嘢幾特別，就係蘭西收到嘅邀請傳真，係由美聯發出。聽聞係因為英皇謝偉銓過檔置地後，公司內部啲人唔係好識地產版記者，所以要搵美記幫手。
地產代理行雖然要緊縮開支，但照開新分行。中原新界舖位組分行今日就開幕，地址喺荃灣英皇娛樂廣場，面積三千呎，將會有三十人。中原商舖部總經理潘志明話，三千呎嘅單位，月租都係幾萬蚊，若果租地舖，分分鐘要十幾萬。
另外，中記施老闆原來噚日牛一，所以新界區一班董事就請佢去唱K。蘭西好奇，施老闆會唱啲乜嘢歌呢？
一年剛過，代理開始派成績表，今日輪到中原公布排名榜。舊年中記共有11間分行佣金過千萬，冠軍係青衣城分行，佣金2400萬；第二位係香港商業部，都過二千萬；跑馬地成和道分行攞到季軍，有千八萬。
葵涌及東涌區助理董事周永輝分析點解青衣城分行咁好景，因為區內多新盤開，好似馬灣珀麗灣、東涌藍天海岸同海堤灣畔等，單係珀麗灣已經有八百萬數；而佢哋又做到十幾宗尖沙嘴擎天半島，所以咁好環境。
周永輝旗下六間分行，舊年做到四千一百萬數，比前年多近兩成。佢手下最佳營業員係羅嘉宏，全年有163萬數，最突出嘅紀錄係個人促成珀麗灣2間海天一色，同3間分層單位。
另外，中記屋邨組過千萬嘅分行包括嘉湖銀座同馬鞍山中心分行，聽嘉湖高級區域經理方啟明講，佣金係1063萬元，主要係因為同事喺一手做到數，一手佣金佔分行一半收入。
地產代理操守問題一直受到外界批評，雖然各大代理行都曾經高調表示，要提高行業嘅專業操守同形象，但似乎唔係好成功。蘭西最近聽到有業主抱怨，指有一次委託某代理行放售手上單位，重透露自己有意換個同屋苑大單位，原本係睇吓自己個單位可以賣到幾多錢，然後計吓能夠換幾大呎數單位。由於個代理態度幾好，呢個業主就好聽話咁簽咗份委託書，點知簽完委託書之後，個代理話畀佢聽，個單位唔可以再放畀其他代理行，因為係公司獨家盤，為期一個月。
業主一心將個單位放通全行，諗住可以盡快賣樓然後買樓，𠵱家睇怕都要遲啲先至可以完成換樓大計。佢就呼籲大家，第日簽文件時記得睇清楚，唔好淨係聽代理講就算，否則費時失事。
另外，有時代理口頭同你講到幾天花龍鳳都好，最緊要係要白紙黑字寫喺份文件度，因為若果佢公司嘅高層唔認數，最後損失就係閣下。
當世界各地寫字樓嘅租務開支，都因為經濟唔好，需求量減少而走下坡之時，解體後嘅俄羅斯，首都莫斯科郤逆市上升，排名躋身全球十大。去年莫斯科寫字樓租用成本名列第八位，較前年跳升三級。每年每方呎租金62.3美元（約486港元），升14.7%。除莫斯科外，英國兩個城市伯明翰同曼徹斯特，就分別由十六同十八位，升上第六同十位。
蘭西
電郵地址：
