英皇高層鄭堯強（Gordon）昨日下午因肺癌病逝，謝霆鋒二十小時內多番前往醫院探望Gordon，提到張栢芝有新男友時，霆鋒木無表情，不作任何回應。除了霆鋒外，英皇老闆楊受成及不少旗下藝人過去兩日亦有到醫院見Gordon最後一面。
個多星期前因肺癌入院的英皇高層鄭堯強（Gordon），昨日下午三時十五分逝世，謝霆鋒前晚及昨日中午先後兩度到東區醫院探望Gordon。
前晚約九時許，霆鋒與陳奕迅、王傑、英皇高層霍紋希（Mani）等在醫院現身，其間他們先在門外抽煙，再折返病房。
部份人逗留至九時許離開，陳奕迅說：「我好怕見呢啲場面，以前有個uncle都係肺癌過身，人生就係咁，it'slife！所以做人要開心過每一日，如果我走嘅話，希望大家開開心心，好似開派對咁。見到Gordon令我諗起籮記（羅文），上年中秋佢送咗隻藍寶石戒指畀我做生日禮物，𠵱家放咗喺屋企珍藏。」記者問霆鋒Gordon情況如何，他搖了搖頭表示不想回應，而葉佩雯和男友Swing前成員Eric離開時，更哭得眼紅紅，至於容祖兒則因為在禁區泊車而被抄牌。
霆鋒與Mani等其後外出用膳，至深夜十一時許折返，Mani向記者說：「霆鋒想陪Gordon過十二點，雖然佢哋唔係特別熟，但話晒都做咗兩年同事，而且人人都話Gordon係好好先生。」
至昨日中午十二時左右，英皇老闆楊受成、高層吳雨、Mani及霆鋒再到醫院探望Gordon，楊受成與吳雨於十二時半離開，吳雨透露情況不太樂觀，他說：「Gordon豎起手指公，讚公司攞獎好嘢。」
而霆鋒則逗留至下午二時十分才離開，記者問他對於張栢芝表示有圈中靚仔男友有何感想，他即時木無表情地望了記者一眼。被問到是否因減肥而消瘦及會否再來探Gordon時，霆鋒亦不作回應，直至記者問他Gordon可有甚麼話對他說，霆鋒才開腔道：「叫啲記者唔好問我咁多問題。」
其後MusicPlus高層甘菁菁發布Gordon的死訊，她說：「Gordon下午三點十五分過咗身，當時屋企人陪住喺佢身邊，至於出殯嘅詳情，暫時未定。」提到霆鋒在醫院探望多時，甘菁菁說：「係呀，我都將消息通知咗霆鋒，佢哋兩個感情OK，話晒曾經一齊作戰過。」
採訪、攝影：胡比、娛樂突發組
