舊年十月，特首妹夫金樂琦俾波羅的海小國拉脫維亞政府相中，委任佢做駐港名譽領事，下個星期一會有個酒會，歡迎拉脫維亞嘅外交大臣、交通大臣訪港，兼正式宣布金樂琦上任。
八方噚日問RogerKing（金之洋名）做乜嘢咁得閒，做完莎莎行政總裁，又改行搞外交？
Roger話拉脫維亞同香港有幾分似，係俄羅斯門戶港口，佢計劃促進兩地表演及視覺藝術交流，又話做名譽領事，心情一啲都唔輕鬆，覺得對香港同拉脫維亞都有好大責任，幾忙都要盡量擠時間做好佢。
佢太座Alice，亦即阿董妹妹金董建平，當然叫過Roger唔好太忙，因為佢有一個幸福家庭，三個仔女、四個孫，重上有八十九歲高堂，所以Roger雖然每日工作十八個鐘，星期日一定留番畀家人。
Roger最近做咗一件人人都話佢「瘋狂」嘅事：呢位身兼科大校董之紐約大學電子工程碩士，八七年完成哈佛商學院高級管理課程後，最近重返校園，走去報讀科大財務課程，同一班二十幾歲年輕人一齊上堂，重新體驗考試嘅痛苦。班同學唔識佢，直至讀到莎莎國際個案研究，至指住書中提到嘅RogerKing問佢：呢個係咪你？
（圖）董建平（左）嘅夫婿金樂琦（右）話佢有問過大舅董建華嘅意見，先答應拉脫維亞政府做名譽領事。
傳真︰2623-9278
電郵︰