特區第一夫人董太呢頭喝住大家唔好淨係識Complain，Complain，Complain，嗰頭八方就收到一位讀者相贈十二對怨氣春聯，對對都啫住全港十七萬公僕。老實講，啲對聯嘅文字功夫認真麻麻，錯字又多，但勝在寫足十二對都係講緊同一樣嘢，認真有誠意，唔怕煩。
好明顯，呢位讀者一定唔係公務員，公務員睇到呢啲攞景春聯會有乜嘢反應呢？公務員工會聯合會副主席劉錦耀起初重可以好心平氣和咁話，自己都食唔飽嘅人，唔希望人哋着得暖係好自然嘅心態，社會上好多人有呢種仇視公務員嘅心理，係可以理解嘅。
劉錦耀並唔同意「公務員大減之日，香江人大發之時。」佢話政府家陣嘅嚴重財政赤字並唔係公務員造成嘅。老劉跟住愈講愈勞氣：「公務員𠵱家已經好動盪，冇一個夥計對自己份職業抱有希望。我喺政府做咗二十幾年，從未試過咁。」佢重好妙咁回敬咗啲春聯：「政府少搞嘢、小問題，大搞嘢、大問題。」
睇怕呢啲春聯都唔會有得賣，否則八方實會買嚟送幾張畀梁錦松同田北俊，佢哋咁大力提倡公僕減薪，睇見啲春聯同佢哋一唱一和，一定會過一個身心愉快嘅春節。
傳真︰2623-9278
電郵︰