小春是一個很奇怪的人，平時出街唔係好講嘢，去到的士高又唔係好願郁，唔知佢慳埋慳埋啲力愛嚟做乜？最近終於開古，原來慳埋慳埋啲力就係留番喺演唱會度走嚟走去，超過兩個鐘頭的演唱會，小春基本上冇停過，處於非常亢奮的狀態。
開騷前綵排，小春與他那一身精瘦的肌肉在巡視服裝與道具，望着那頂紅色長羽毛的紅番冠，幻想穿着它在台上搖曳的動態，小春嘴角露出笑容說道：「呢件惡呀！」其實那套綠色筋肉超人衫更惡，難得小春鍛煉得咁好身材，着住嚟跳舞真係好好睇，如果想多個比較就不妨做套畀我着吓，當堂變咗綠色筋腩撈粗。
個人覺得全晚最好睇嘅係小春與舊日舞林戰友同台演出，小春分批與他們夾舞，除了真係冇花冇假，個個跳得之外，還有的是那一份當年情，成班舊朋友當住萬幾人面前一齊玩，夫復何求？
小春在演唱會的完結部份鄭重地問觀眾：「滿唔滿意？」答案是肯定的，觀眾付出了票價，得到超額的娛樂，小春開心得搔頭搔頸。
緊記這一個心，一顆一心想令觀眾覺得滿意的心，有這顆心未必一定成功，但沒有這顆心的藝人則一定冇運行。