八方以為做傳媒先要收風，點知原來選管會主席胡國興都要收風，唔係都幾大鑊。好似區議會加多十席咁，政府就一直冇人單聲畀選管會知，搞到胡官個幾月前劃好晒選區分界，之後先收風知道加議席，又要重頭做過。
胡官收區議會選舉嘅風遲咗，收村代表選舉嘅風就多好多。佢話年底就嚟嘅七百幾條鄉村選舉，聽講會連續六個星期六、日舉行，即係夾埋十二日，佢都要親自踩落村周圍行。
不過好彩村選投票時間冇區議會咁長，胡官唔使由清晨七點半踩到夜晚十點半，但係到時一日之內有成七十條村選舉，場面都好壯觀。胡官都做足準備工夫，下個月就會公布備受關注嘅村選選舉指引，喺特首選舉指引之上再加多啲條文，希望到時一切順順利利啦。
（圖）胡官搞選舉都要靠收風。
傳真︰2623-9278
電郵︰