港股噚日走勢先低後高，最後升82點，收9665。恒指2003年連升3日，共升344點，雖然過去兩日升市成交唔算大，只有四十幾億元，但好友由捱打變主動，整體形勢出現明顯變化，若外圍美股繼續升，好友今次可以打響頭炮。
上周五美股杜指回吐近50日線已見支持，加埋噚日外圍杜指期指上升，美股周一晚繼續升機會頗大。杜指保歷加通道急速收窄，目前頂部阻力在8672，短期若能以大陽燭撐穿，不但有機上試8800，甚至可挑戰去年12月初高位9043。另一方面，如果杜指升近8672已回頭，並跌穿20日線8495，則今次反彈係咁先。
恒指噚日再升82點，重返20日線（現處9646）之上收市，9RSI升穿50中軸，都係利好短線訊號。若美股周一晚進一步上升，恒指今日會挑戰50日線阻力（現處9762），破位向上填補去年12月4日下跌裂口10123至10179；若美股周一晚大幅回吐，則好友今次反攻只屬超賣反彈，彈完之後再尋底。
由於形勢未明朗，趙飛雲暫時按兵不動，待好淡戰況較明朗時才出擊。若恒指確認升破50日線企穩，可先買入1注恒指Call輪9552，升破9900加注，以10123為首個目標。相反，若恒指挑戰50日線失敗，估計會回試近期低位9244，可伺機追入恒指Put輪9556。
短期而言，若非出現突破性利好或利淡消息，恒指波幅大約400點左右，Call輪及Put輪其實唔容易炒。
趙飛雲