上星期答過一位讀者劉小姐關於「五常法」嘅書，左丁山話唔識去邊度買。兩位熱心讀者立即來電郵通知。Heidi話唔使買書，公共圖書館就可以借到，公共圖書館內工商管理學嘅索書號均以「四九四」開頭，好容易搵。Helen話最好直接問：香港五常法協會，新界粉嶺馬適路三號綠悠商場二樓一號。多謝Heidi與Helen咁熱心幫忙。
另外高小姐亦來電郵，講「雅虎香港」初選二○○二年最佳網站共十二個，畀網民投票選出一個最佳網站。問左丁山鍾意邊一個。一睇之下，雅虎又幾好心機去挑選噃，並唔係人人都識得揀嘅，呢十二個網站分別係：香港汽水收藏館、男士健康、美洲古文明、下載王、中華里、香港五十種常見的樹木、香港資訊教育城、歷代服飾、生活易、香港專業服務網站、勇想廿一、娛樂網。而三個喺內容、設計、好用三方面都得到雅虎五粒星至四粒星嘅係中華里、教育城、生活易。
呢三個網站左丁山都有睇過。教育城係教育署傾力之作，用咗「優質教育基金」兩三千萬元，有全職CEO負責監督。生活易係和黃集團得意傑作，財雄勢大唔在講。「中華里」呢？得到「優質教育基金」一年贊助費幾百萬，做咗一年就被腰斬，被迫裁員，一味死捱，估唔到亦做出好成績，畀雅虎睇中！據雅虎講：網站設計搶眼醒目，卡通畫生動有趣，互動性強，叫人眼前為之一亮，看罷才知歷史如此多Fun。