由瀧澤秀明同今井翼組成嘅瀧與翼，上年出道嗰陣被喻為攞硬新人獎嘅超級組合，但係出奇地唱片銷量只係一般，佢哋嘅處男作《Hatachi》只係賣到二十六萬張，喺Oricon年終大碟榜排第七十二位，輸畀同樣係上年出道、後生過佢哋嘅w-inds足足二十位，唔通老幾年就真係差啲？
既然橫掂都俾人嫌老，瀧仔同翼仔近排索性轉走man路線，重專登請咗著名寫真集大師篠山紀信幫佢哋影咗輯跳躍露點宣傳相。喺篠山大師嘅鏡頭下，瀧仔同翼仔着上充滿男人味嘅透視裝，不停咁喺度跳，希望表現出佢哋成熟又活力嘅一面！
而一向唔會提感情事嘅瀧仔同翼仔，話晒都過晒二十歲，終於可以大膽啲講結婚嘅問題。瀧仔話最希望同一啲可愛得嚟又爽朗嘅女仔結婚，相反翼仔嘅要求都幾高，佢話：「我鍾意外表斯文，不過談吐就好似男人咁爽嘅女仔，結咗婚之後每日煮好飯等我返屋企就最理想嘞！」