王晶公司製作嘅電影《誘人犯罪》，搵咗梁敏儀同錢嘉樂擔正，麥家琪就客串演出，真係諗唔到，麥家琪又幾唔話得，喺戲入面賣大包，佢除咗同梁敏儀有同性戀親熱戲外，有一場戲佢要着住一條低胸吊帶裙食雪茄，酥胸半露，好鬼性感。
梁敏儀今次喺戲入面做一個卧底記者，為咗攞料，佢要色誘男人攞料，梁敏儀話：「我拍呢部戲嘅戲份好重，所以都幾緊張，因為我演戲經驗唔多，所以都驚做得唔好。喺部戲度，我有性感演出，但唔算勁，如果將來有需要，個劇本又好，我係唔介意有更大膽嘅演出。另外，我最感動係麥家琪今次咁幫手，肯友情客串。」
前晚陳奕迅（Eason）同容祖兒開開心心出席《勁歌》頒獎禮攞獎，噚日就分別去咗東區醫院探英皇高層鄭堯強。
英皇高層吳雨同霍紋希、無綫高層何麗全等都有去，Eason同祖兒都喊住喺病房出嚟，後來連謝霆鋒同王傑都有到，其實祖兒前晚攞獎時，都話希望鄭堯強早日康復，再一齊拼個你死我活。後來佢知自己講錯嘢，就補飛話拼個你精我采同你歌我唱都得喎。
港澳影劇總會前主席、新華影業公司負責人童月娟女士，不幸噚日喺上海博愛醫院因心臟病病逝，享年八十九歲。童月娟原名萬秀英，七三年開始當選港九影劇自由總會主席，主要為會員爭取福利，到八一年做埋台灣第一屆僑選監察委員，後尾移民加拿大，到年幾前因身體多病先至返咗去上海休養。
寶詠琴換腎之後，目前仍然喺中山大學附屬第五醫院休養，記者噚日去醫院見佢冇打開窗，而且連窗簾都拉埋。不過，醫院副院長胡紅星話，寶詠琴今次嘅手術好成功。
記者問胡紅星寶詠琴𠵱家嘅情況，佢話：「佢要長期食藥，寶小姐食嘅藥大概要三千蚊人民幣一百粒（約港幣二千八百多元），一日要食十至十二粒左右。」唔知寶詠琴換腎時有冇將本身個腎切除？胡醫生話：「多數香港人都會保留番原本個腎，而掛多一個腎。」
佘詩曼噚日原本要去觀塘裁判法院應審，因為佢揸車喺兩年內四次俾人扣咗十六分，所以要停牌。原本要應審嘅佘詩曼，冇去到法院，最後裁判官就話可能被告唔喺香港，要check吓入境處嗰邊，睇吓佢係唔係出咗境，結果裁判官就話將件案押後去到今個月二十七號再審。
