噚日班立法會議員就落馬洲全日通關後嘅公共交通安排，同政府官員針鋒相對，話點都唔信啲官話嗰度地方狹小，如大開中門畀小巴同的士行會造成交通大擠塞，於是覺得應該親身去視察吓，約定呢個禮拜五一早北上。
俾內地視為反中亂港分子之一嘅民主黨議員鄭家富，已經被禁返大陸好耐，聽到可以北上，一時思念祖國之情就湧咗上嚟，於是同委員會主席劉健儀講笑咁講：「過埋皇崗視察重好，等我可以返去，真係好掛住！」劉健儀就同佢講事實：「呢個有啲困難喎！」
噚日班議員就夾日子時間去視察，有人提議星期六下晝，話可以方便某啲成日要北上嘅議員，可以順道揸車返去，呢句話分明暗寸朱幼麟啦，因為飛天朱噚日都話，差唔多每個禮拜都返內地。至於係邊個議員咁講，八方就賣個關子。
傳真︰2623-9278
電郵︰