天籃地北：NBA瘋狂預測

踏入2003年，不少NBA球評家已作出各種正路預測，今日不如同大家估吓，今年NBA會唔會出現以下嘅「瘋狂事件」。

1.華萊士掟攝影師
繼去年添夏達威怒掟電視；今年阿達斯更加連攝影機都掟埋，嚟緊呢年相信係出名臭脾氣嘅華萊士連攝影師都掟埋一份。

2.BADBOY變BOOMBOY
活塞見隊波有賓華萊士呢個籃板王助陣，團隊籃板數字都排喺尾二，竟然迫成隊波電晒爆炸裝，實行「唔睇得都嚇得」；從此BADBOY變BOOMBOY。

3.積遜變真「禪師」
湖人頹勢不止，老闆畢斯對住積遜教練日哦夜哦，禪師忍無可忍，連老闆女都唔要，寧願掛冠入深山坐禪，做真正嘅「禪師」。

4.姚明突破1億票
喺龍的子孫相助下，姚明不但膺明星賽票王，票數重突破一億大關；見錢開眼嘅史坦高調宣布：下屆明星賽響中國舉行。

5.巫師變老鬼夢幻隊
佐敦入季後賽失敗，唔忿氣下由高呼Iamback！變為Idon'twanttoleft！更號召柏賓、馬龍、史托頓及米拿等老鬼，加上奧克利同伊榮，將巫師變為老鬼夢幻隊，順利贏得總冠軍，齊齊等入名人堂！
文：仙道彬
e-mail:[email protected]